Reportajen Silvino Freitas
Prezidente Autoridade Munisípiu Dili sei serbisu hamutuk ho Komisaun Nasionál Direitu Labarik (KNDL), atu kontrola labarik sira nune iha tinan oin 2022, labarik labele fa’an tan sasan iha lurón públiku.
Prezidente Autoridade Munisípiu Dili, Guilhermina Ribeiro hateten direitu labarik nian hahú husi idade kiik to’o 17 anos, ne’e responsabilidade inan-aman nian, ne’ebé mak lei prevee ona iha konstituisaun RDTL.
“17 anos ba leten bainhira sira hetan ona kartaun eleitoral ne’e sira bele, maibe husi 17 mai kraik ne’e responsabilidade inan aman sira entaun se responsabilidade inan aman sira, hakarak ka lakohi tinan oin labele iha labarik sira mak faan fali sasan iha dalan ninin, labarik sira ne’e nia fatin ne’e iha eskola ou iha uma, ida faan sasan buka osan ne’e inan aman nia responsabilidade labarik sira ne’e tenki fo tempu barak ba sira atu estuda no halimar lalos sei kiik ita haruka fali sira ba faan fali sasan” dehan Prezidente Autoridade Munisípiu Dili Guelhermina iha salaun PNTL Kaikoli, (21/12.)
Nia hatutan maske iha familia balun ne’ebé mak kbiit laek, maibe nia responsabilidade ne’e inan-aman lalos fo todan ba oan sira, oan sira enkuantu oan sira sei kiik labele fo todan ba sira hodi faan sasan, maibe fo tempu ba sira atu estuda no halimar, labele fo responsabilidade ba sira wainhira sira sei otas-kiik.
“Hau hanoin tinan oin mai hau tenki servisu ho komisaun labarik sira nian atu oinsa bele kontrola labrik sira, no lakohi hare labarik sira servisu faan sasan” nia konkliu.