Reportajen Silvino Freitas
Sekretariu Estadu Protesaun Sivil (SEPS) liu husi Diresaun Nasional Prevensaun Konflitu Komunitaria(DNPKK) parseria ho Plan International Timor-Leste (PITL), realiza formasaun ba ajente PNTL Munisípiu Dili, kona ba jestaun emosaun, prevensaun konflitu no protesaun labarik.
Diretór DNPKK, Antonio Viegas hateten formasaun ne’e atu professionaliza ajente PNTL sira, hodi nune bainhira sira atu halo atendimentu iha tereinu liu-liu ba ema vulneravel, feto no labarik-feto.
“Bainhira sira ba hasoru komunidade sira, liu liu ema vulnerabel, feto no labarik-feto sira, oinsa ho professional atu hasoru sira no mos ita nia komunidade sira seluk bainhira sira halo konflitu, membru PNTL bele ho professionalmente hodi atende ba konflitu oin oin ne’ebé mak akontese iha Dili laran” dehan Diretór DNPKK iha Salaun PNTL Munisípiu Dili, 21/12.
Nia hateten tuir planu formasaun sei lao nafatin ba ajente PNTL sira, maski tuir formasaun ne’e maioria Ofisial Polisiamentu Suku (OPS) maibe foku liu atu professionaliza ajente PNTL sira, tanba bainhira ajente PNTL sira halo atuasaun iha tereinu, la kontrola emosaun ikus mai ho ran-manas lori pistola hodi halakon ema nia vida.
Iha fatin hanesan reprezentante Komandu PNTL munisípiu Dili, inspetór Xefe Polisia, Delfin da Silva hateten formasaun ne’e importante tebes, tanba parte ida atu guia ita nia servisu ho professionalizmu.
“Hanesan bain-bain ema hotu kestiona profesionalizmu PNTL nian, barak liu mak dehan la professional ne’e, maibe tinan 20 ona halo mos buat diak barak rezultadu servisu diak mos barak dala barak ema la duun hetan” Dehan Inspector Xefi Delfin da Silva.
Nia parte mos agradese ba DNPKK no PITL ne’ebé mak halo programa jestaun emosaun, prevensaun konflitu no protesaun labarik, importante tebes ba ajente PNTL sira hotu tamba ne’e aproveita didiak oportunidade ida ne’e ho diak, nune bele hetan siensia sira ne’ebé mak relevante tebes ho imi nia moris.
Sorin seluk Prezidente Autoridade Munisípiu Dili, Guilhermina Ribeiro rekoñese katak durante ne’e servisu PNTL nian halo ona buat barak, no husi buat hirak ne’e hotu iha mos diak barak.
“Ita boot sira halo ona buat barak liu husi buat barak ne’e mos iha diak ne’ebé mak ita boot sira halo ona, maibe kuandu iha diskuidu uituan halakon hotu buat diak ne’e foti liu mak buat at, ne’e iha kualker situasaun ne’ebé de’it maibe hau senti katak ita boot sira motivadu nafatin, ba situasaun ida ne’e iha fatin ne’ebé de’it kontrolu sosial ne’e sempre akontese nunee” dehan Prezidente Autoridade Munisípiu Dili Guelhermina iha salaun PNTL Kaikoli.
Guilhermina konklui iha familia ida nia laran mak oan ida halo buat kiik ida ne’ebé mak la diak, ita konsidera beik teen ne’e lalos beik maibe deskuidu, tanba ne’e kona ba jestaun emosaun ne’e difisil tamba emosaun ne’e karakter orijinal.
