Home Justisa 21 Dezembru Tribunal Oecusse Anunsia Desizaun Final ba Richard Daschbach, Vitima Husu...

21 Dezembru Tribunal Oecusse Anunsia Desizaun Final ba Richard Daschbach, Vitima Husu Kastigu

2043
0
Richard Daschbach akompana hosi membru PNTL iha Tribunal Oecusse (Foto: AP/Oki)

Audiensia ba julgamentu ikus kazu Topu Honis hasoru Richard Daschbach termina ona horiseik, 25 Novembru. Tribunal Oecuse marka ba loron 21 Dezembru nudar loron atu halo leitura ba desizaun Tribunál nian. Vitima husu se arguidu hetan kondenasaun kriminál no, karik loos, husu atu kastigu ka fo sentensa.

Prokurador Titular ba Kazu Topu Honis, Dr. Matias Soares ba Neon Metin, ohin (26/11) via telefone informa dehan julgamentu ba kazu Topu Honis remata ona iha loron 25 Novembru no tribunal sei anunsia desizaun final ka halo leitura iha loron 21 Desembru.

Antes ne’e vitima sira husu sekarik Richard Daschbach sala husu atu hetan kastigu. Maski nune’e sedauk hatene desizaun final no hein tribunal mak sei hatoo.

Prosesu krime prosesu ida ne’ebé ketak hosi prosesu dixiplinár hosi Igreja rasik. Haree ba prosesu dixiplinár hosi Igreja Katólika, hatún tiha ona dezde Novembru 2018 sentensa demisaun hosi klériku hasoru Richard Daschbasch tanba komete abuzu seksuál hasoru labarik ne’ebé hetan mahon iha orfanatu Topu Honis iha Oecusse ne’ebé Richard nu’udar Diretór. Tuir informasaun hosi Núncio Monseigneur Marco Sprizzi, sentensa hosi Kongregasaun Doutrina Fé nian, desizaun hakotu ona labele kansela.

Tuir Lei Timor-Leste nian, Kastigu tuir Kódigu Penal ba kada krime abuzu seksuál ba menór (artigu 177 Kódigu Penal) prizaun entre tinan 5 to’o 20 bainhira ho menór tinan 14, no kastigu krime pornografia infantil (artigu 176) mak prizaun entre tinan 3 no 10. Maibé haree ba lei, kastigu máximu akumuladu mak tinan 30.

Akuzasaun hasoru eis-padre RD mak hanesan kazu abuzu hasoru labarik ne’ebé ho númeru vítima a’as liu iha Timor-Leste to’o ohin loron.

Kazu ne’e julga hosi painél Juiz iha Tribunal Oecusse nian mak lidera hosi Dr. Yudi Pamungkas. Prokuradór mak Dr. Matias Soares no Defeza hosi arguidu reprezenta hosi Dr. Miguel Faria ho nia ekipa hosi SGF Legal & Business Consultan. Vítima sira hetan reprezentasaun legál hosi Dra. Hildegardis Wondeng no Dr. Olívio Barros hosi JU,S Jurídico Social.

Timor-Leste iha prevalénsia a’as violénsia hasoru feto no labarik feto, no tuir dadus ofisiál liu 1/3 hosi feto sai vítima violénsia doméstiku iha sira-nia moris no ho 75% feto no mane hanoin katak laen ida bele iha justifikasaun atu baku ninia fein. Dadus mós hatudu maiór parte hosi feto no labarik feto vítima violénsia la fó-sai sira-nia esperiénsia nu’udar vítima violénsia. Timor-Leste aprova ona Planu Nasionál kombate Violénsia Bazeia ba Jéneru 2017-2021 ne’e bé agora dadaun sei iha revizaun hodi aprova planu foun ba períodu 2022-2027.

Print Friendly, PDF & Email

LEAVE A REPLY

Please enter your comment!
Please enter your name here