Home Notisia Rezerva mina Iha Tasi Okos Komesa menus, Mariano: Presiza Dezenvolve Setór Produtivu

Rezerva mina Iha Tasi Okos Komesa menus, Mariano: Presiza Dezenvolve Setór Produtivu

528
0
Membru Koligasaun Agrikultura no peskizador La'o Hamutuk. [Foto: Santy | 25.11.2021]

Reportajen Santina Lucia da Costa

Membru Koligasaun Agrikultura hanesan mós Peskizadór Lao hamutuk, Mariano Ferreira hateten, rezerva mina ne’ebé mak iha tasi okos kuaze menus hotu, no kuaze konverte hotu ona ba orsamentu ne’ebé mak agora daudaun hala’o hela dezenvolvimentu.

Nia dehan osan liuhusi mina, ita presiza organiza investe orsamentu ho didi’ak, para bele hamoris duni ekonomia setór sosiál sira.

“Lao Hamutuk nia haree, tuir dadus ne’ebé ita hetan husi Kompanhia Mina sira hatudu katak, ita nia rezerva mina ne’ebé mak iha tasi okos kuaze menus hotu no kuaze konverte hotu ona ba orsamentu ne’ebé mak agora dadaun hala’o hela dezenvolvimentu.” Dehan, Membru Koligasaun Agrikultura hanesan mós Peskizadór Lao hamutuk, Mariano Ferreira, iha Edifisiu HASATIL, Farol, 25/11.

Mariano afirma tuir dadus mós dehan, mais no menus tinan 2023 ba oin sei laiha tan mina rezerva iha tasi okos, no só iha de’it osan ne’ebé mak agora iha. Entaun hatudu katak, mina ne’e la renovavel no maski ita iha mina mais Timor-Leste la’os riku mina.

“Ita presiza hanoin maka oinsa atu uza osan husi mina ne’e, bele dezenvolve agrikultura no mós setór sira seluk, Indústria iha rai laran, Turizmu, Kooperativa, bele loke kampu serbisu barak liu ba populasaun barak liu duke setór mina, ita haree katak setór mina ne’e ema serbisu uituan de’it no ema ne’ebé mak tenki ho skill as.” dehan Mariano Ferreira.

Nia subliña setór agrikultura, kooperativa, se ema iha vontade hakarak serbisu di’ak no iha kondisaun di’ak sei fó serbisu barak ba ema duke setór mina nian.

Nia akresenta Timor-Leste sei nafatin depende ba fundus mina ne’e risku teb-tebes ba iha tinan 10 no 20 oin mai, se osan mina laiha ona, oinsa ita lala’ok dezenvolvimentu iha rai laran, ne’e problema boot ida.

Mariano realsa tan katak, Se iha osan liuhusi mina, presiza organiza investe orsamentu ho didi’ak para bele hamoris duni ekonomia setór sosiál sira, por ezemplu edukasaun ita nafatin iha problema, eskola publiku iha Dili laran no mós iha Munisipiu sira problema barak, entaun ita tenki investe duni ba oinsa hadia setór edukasaun atu nune’e bele produz ema ho kualidade para nafatin hala’o dezenvolvimentu ida ne’e.

 “Ami hanoin katak, oinsa uza osan mina ne’e, haforsa setór produtivu no mós haforsa setór sosial sira mak hanesan edukasaun, saude, no seluk tan.” Tenik, Mariano.

Print Friendly, PDF & Email

LEAVE A REPLY

Please enter your comment!
Please enter your name here