Reportajen Santina Lucia da Costa
Prezidente Republika, Dr. Francisco Guterres Lú Olo halo enkontru ho Partidu Kmanek Haburas Unidade Nasional Timoroan (KHUNTO) hodi fó opiniaun molok dekreta data eleisaun prezidensial. No KHUNTO fó apoiu desizaun Xefi Estadu Foti.
Hafoin enkontru, Prezidente Partidu KHUNTO, Armanda Berta, hateten, Fó apoiu tomak ba desizaun ne’ebé Prezidente Republika foti.
“Hosi opiniaun KHUNTO nian, desizaun saida de’it maka Prezidente Republika foti partidu KHUNTO fó apoiu, liuliu kona-ba data eleisaun Prezidente Republika nian.” hateten, Prezidente Partidu KHUNTO, Armanda Berta ba Jornalista sira hafoin enkontru ho Xefi Estadu iha Palasiu Prezidensiál, Nicolau Lobato, Bairu-Pite, 7/01.
Prezidente Partidu KHUNTO, dehan, bainhira Xefe Estadu dekreta data eleisaun, Partidu KHUNTO prontu atu bele partisipa.
“KHUNTO preparadu, maibé data fiksu seidauk fó sai, Prezidente Republika dekreta ona mak partidu KHUNTO prontu atu bele partisipa iha eleisaun Prezidensial.” hatutan, Armanda Berta.
Armanda Berta haktuir Prezidente Republika apresia kontribuisaun partidu KHUNTO nian ba afirmasaun hametin estadu direitu no demokratiku.
Tuir Konstituisaun Republika Demokratika Timor-Leste (K-RDTL) artigu 86, hateten, Prezidente Republika mak marka loron ba eleisaun Prezidente Republika no Parlamentu Nasional.
Entretantu molok dekreta data eleisaun Prezidente Republika, Tuir artigo 12 husi lei Numeru 7/2006, 28 Dezembru ho alterasoins susesivas ba lei ne’e, tenke rona uluk governu no partidus ho asentu iha Parlamentu Nasional.
No iha loron 6-7 Janeiro 2022 Prezidente Republika sei rona Partidu Politikus sira ho asentu iha Parlamentu Nasional atu hatene sira nia hanoin kona-ba data eleisaun prezidensial ne’ebé sei akontese, pelu menus loron 60, molo Prezidente Atuál remata ninia mandatu iha 20 Maiu 2022.