Reportajen Umbelina dos Santos
Sekretáriu Estadu Formasaun Professional no Empregu (SEFOPE) liu hosi Diresaun Nasionál Empregu Exterior (DNEE) iha loron 16 Fevereiru, asina deklarasaun akordu ho família traballadór Korea du Sul na’in 58, antes traballadór sira arranka ba serbisu iha Korea du Sul iha loron 18 Fevereiru tinan ne’e.
Iha asina deklarasaun ne’e, Diretór DNEE Filomeno Soares hateten, objetivu hosi enkontru ohin loron ne’e husi parte governu no família sira mai hamutuk iha fatin ida ne’e hodi partisipa asina deklarasaun família hodi halo komitmentu, katak traballador sira prontu ona atu husik sira nia família hodi ba servisu iha rai li’ur.
“Tanba ita hotu-hotu hatene katak programa haruka traballador ba servisu iha Korea du Sul ne’ebá la fasil ida, traballador sira liu husi prosesu no sofrementu nia laran, sira tuir formasaun durante fulan 6 to’o tinan ida, maibé sira pasénsia hein ohin loron sira bele hetan duni rezultadu ne’ebé mak ohin ita selebra asina deklarasaun husi parte governu, SEFOPE no mos husi parte família hodi husik oan sira iha ita nia leet, karik aban bairua sira hetan problema ruma ita hotu-hotu hamutuk hodi responsabiliza,”_ Diretor DNEE Filomeno hatete.
Diretor nia intervensaun katak karik traballador Timor oan mate iha Korea du Sul entaun problema hirak ne’e governu hamutuk ho família kolabora hodi rezolve, labele dehan governu mak haruka ba, entaun governu mak tenke responsabiliza, karik traballador balun hanoin hanesan ne’e di’ak liu lalika asina deklarasaun.
Diretor Filomeno hato’o mos ba traballador sora katak SEFOPE konvida mos reprezentante airlines ne’ebé SEFOPE servisu hamutuk, hodi fasilita traballador sira ba, no sira prontu wainhira ita iha ema ka pasajeiru, “ami tenke hamutuk ho aerlines hodi halo karta aprovasaun ba Ministériu Transporte hodi bele hetan aviaun para tula traballador sira ba, ne’e la fasil ida,” nia hatete tanba Timor-Leste la iha aviaun regular, tanba ne’e airlines prontu fo kadeira 50 ka 60, nune’e SEFOPE ho esforsu oinsá mak atinji duni númeru ne’ebé mak aerlines fo.
“Desizaun ne’e husi Ministériu Traballu Korea du Sul mak fo, ami ne’e hanesan fontes de’it ligasaun ho sira, oinsá mak traballadór Timor ne’e bele ba tama iha Korea du Sul ne’ebá,” Diretor Filomeno hato’o.
Iha fatin hanesan Sekretáriu Estadu SEFOPE, Alarico do Rosário dehan ba traballadór foun sira katak ba nasaun seluk ne’e hanesan reprezentante Timor-Leste, ba kuidadu malu hanesan Timor oan no labele deskrimina malu.
“Ne’e duni ba joven sira ne’ebé mak ba Korea du Sul, tenke servisu ho di’ak atu bele kontribui ba nasaun aban bainrua nian no kapasidade no koñesimentu wainhira ba estranjeiru, no husu ba jovens sira hatudu komportamentu ne’ebé mak di’ak iha ema nia rai, no labele ses husi sistema (SEFOPE) nian atu nune’e labele taka dalan ba Timor oan iha futuru oin mai,”_ lia menon Sekretária Estadu Alarico ba traballador sira ne’ebé atu ba servisu iha Korea du Sul.
Total traballador Korea du Sul na’in 58 ne’e sei arranka iha loron 18 fulan ida ne’e, no sei to’o iha nasaun Korea du Sul iha loron 2 fulan Marsu, iha ne’ebé sira sei liu hosi nasaun Malásia no Singapore.