Reportajen Umbelina dos Reis
Komisaun Nasionál Eleisaun (CNE) ho Konsellu Nasionál Juventude Timor-Leste (CNJTL), realiza semináriu nasionál ba edukasaun sívika ho tema “Hakbiit juventude sira nia sentidu ba pertense aktu eleitorál, iha ámbitu eleisaun prezidente RDTL ba períodu 2022-2027”, oinsá juventude sira iha hanoin ho ideal no rasionál, hodi fo sira nia votu ho loos ba kandidatu prezidente tinan lima mai.
Iha semináriu ne’e Prezidente CNE, José Belo hateten juventude sira iha tinan 1975 ho juventude sira agora ne’e nia situasaun diferente tebe-tebes, tanba jerasaun foun sira agora ne’e mos kandidatu aan ba prezidente ne’ebé hamutuk kandidatu na’in 16, joven sira agora mai ne’e ho otas ne’ebé nurak, nune’e oportunidade hanesan ne’e hodi substitui jerasaun foun sira.
“Sira ne’ebé konkorre ne’e investe ona iha tinan 24 liu ba, atu investe ba futuru aban bairua nian, tanba juventude mak futuru nasaun nian, maibé ikus ne’e sai dezafiu ba joven sira tanba ita sai sentru ida ba esperansa no pensamentu ne’ebé diferente,” dehan Prezidente CNE Jose Belo iha nia diskursu, iha Salaun Laline Lariguto, Kolmera, 21/02.
Nia dehan juventude ida agora ne’e barak tebe-tebes ne’ebé primeira vez kandidata ba prezidente iha Timor tinan 2022-2027 hamutuk na’in 16, nia dehan prosesu ne’e demokrátiku no ita moris iha duni dinámiku. Nia akresenta kandidatu hirak ne’ebé admitidu la’o tuir prosesu rua hanesan, prosesu organizasaun joven nian, no iha prosesu tranzmisaun ba ida ne’ebé sai lider ba aban bairua nian.
Iha Fatin hanesan Prezidente CNJTL, Maria Dadi Soares Magno agradese ba moris ho valores nu’udar sidadaun Timor oan, no valores hanesan juventude Timor oan ne’ebé iha responsabilidade tomak hanesan sidadaun di’ak ida.
“Sidadaun ne’ebé di’ak tenke haktuir no hatene direitu no dever, se ita liga ba konstituisaun artigu 19 aliña 1, ko’alia konabá dever ne’ebé mak sidadaun tenke halo, aliña 2, koalia kona ba direitu estadu no diferente atu promove juventude sira,” Dadi hatete
Nia hatutan sidadaun sira presiza konsolida unidade nasional ba rekonstrusaun país, ida ne’e dever ne’ebé mútua ba kamada juventude hotu nia di’ak, direitu kaer ona katak estadu fo nia kbiit no promove edukasaun no promove formasaun no kultura ba joven sira.