Reportajen Santina Lucia da Costa
Relasiona ho udan boot ne’ebé akontese loron 21 Segunda mais ou menus oras tuku 15.00 lokraik, afeta mota tun nune’e hamosu inundasaun iha Suku Comoro, no tuir dadus provizóriu iha uma kain 52, ema hamutuk 169 mak afeta, inklui inan isin rua, no labarik idade menus husi tinan 5 hamutuk nain 52, ne’ebe oras ne’e dadauk evakua iha sentru evakuasaun salaun Dom Bosco-Comoro
Iha sentru evakuasaun ba Neon Metin inan isin rua, Aliança Soares (36) , hela fatin Fomento II haktuir, Mota boot tun iha oras tuku 15:00, mota boot tun mai lori tiha didin lutu iha varanda monu tiha, uma tabele hela, uma iha mota ibun kedas, ne’e mak ho labarik sira halai sai tiha, haree mota tun mai boot, lalin sasan sai hotu ba leten.
“Bebe agora iha isin fulan sia (9), agora dadaun hau grave hela hanesan ne’e mak udan, mota tun boot senti ladun di’ak no triste, ami hela iha mota ninin ne’e hodi buka moris, hau nia laen peneira rai-henek hodi sustenta ami nia moris. Ami iha oan na’in lima, na’in rua ba tiha ona ho nia avo sira, na’in tolu feto ida ho mane rua mak hela ho ami.” Tenik Alianca iha Sentru Evakusaun Dom Bosco, Comoro.
Aliança hateten nia afeta ona dalarua husi inundasaun ne’ebe akontese, ba dala uluk mak iha loron 4 Abril 2021, no ohin loron 21 Fevereiru
Inan gravida ne’e husu ba governu, atu bele tau matan ba situasaun ne’ebé agora dadaun sira hasoru hela iha motan ninin hodi buka nia moris, nune’e bele sustenta uma laran.
Iha fatin hanesan Evaristo de Deus Mateus, idade 40, nu’udar kaben husi Aliança Soares hateten, serbisu lorloron mak peneira rai-henek, hodi sustenta feen ho oan sira, serbisu seluk laiha.
“Ohin udan maka’as ne’e udan sa’e ba foho leten komesa nakukun, ami pinera hela rai-henek iha mota laran, depois ho kolega sira dehan udan boot hanesan nene ita lori redi sira ne’e tula sa’e tiha ba leten, ami hanoin mota tun ne’e hanesan baibain, maibé mota tun mai boot hodi ai bot-boot sira ne’e, uma varanda ne’e mak sorin mota lori tiha, uma agora tabele hela, ami senti ladi’ak ami ses-an tiha.” akresenta, Evaristo de Deus Mateus.
“Hau senti triste liu tanba agora hau nia ferik-oan mos gravida hela, bebe iha isin fulan sia ona. Ami to’o iha sentru evakuasaun oras tuku 20:00 kalan, ami seidauk han, ami to’o iha ne’e buka hahan iha ne’ebé só tur no toba de’it ona.” Dehan Evaristo.
Tuir observasaun Neon Metin iha Sentru Evakuasaun Dom Bosco Comoro, Ekipa autoridade Munisípiu Dili no Sekretáriu Estadu Protesaun Sivil (SEPS), hala’o ona intervensaun, hodi sasán emerjénsia no ai-han ba komunidade afetadu sira, no maioria komunidade sira sedauk han, tanba sira evakua iha tempu kalan.
