Reportajen Santina Lucia da Costa
Prezidente Komisaun Nasionál Eleisaun (CNE), José Belo ho komisariu sira hala’o enkontru ho Prezidente Repúblika, Dr. Francisco Guterres Lú Olo hodi koalia kona-ba preparativus sira husi CNE, antes tama ba kampaña sei halo prosesu ritual, lia na’in hamutuk ho autoridade kada Munisipiu ninia kultura, nune’e fó forsa natureza la’o hamutuk ho kandidatu hamutuk 16.
Hafoin enkontru Prezidente CNE, José Belo hateten preparativus sira husi CNE antes tama ba kampaña sei halo prosesu Ritual, Lia na’in hamutuk ho Autoridade Munisípiu ida-idak nia kultura.
“Ami enkontru ho Prezidente Repúblika mai informa hela kona-ba antes tama ba kampaña sei iha munisípiu hotu-hotu, inklui iha nasionál, ita sei iha prosesu ritual ida ne’ebé sei halo iha munisípiu lia na’in sira hamutuk ho hamutuk ho ita nia autoridade sira, halo tuir kona-ba kada munisípiu ida-idak ninia kultura atu nune’e fó forsa natureza ne’e bele la’o hamutuk nafatin ba kandidatu hotu-hotu la’ós kampaña de’it, Maibé ita nia apoiante sira ne’ebé iha atu hotu-hotu iha seguru prosesu kampaña ida ne’e la’o di’ak to’o ita eleisaun.” Informa, Prezidente CNE, José Belo ba Jornalista sira iha Palasiu Prezidensial Nicolau Lobato, Bairu-Pite, 21/2.
José Belo hatutan rezultadu husi munisípiu ne’e lori mai Dili 28 Fevereiru 2022, sei halo prosesu ritual, tanba haklaken de’it pontu importante ne’ebé halo ona iha munisípiu, Dili sei iha konjuga mós ho asina paktu entre kandidatu sira atu nune’e sira fó hanoin ida kaer liman hamutuk oinsá atu fó hatene ba ita nia eleitór sira katak, eleisaun ne’e prosesu ida demokrátiku la’o hanesan ne’e.
“Kona-ba data ne’ebé kampaña ami sente dehan rona hotu ita nian reprezentante sira atu nune’e fó konsulta ba kandidatu sira ne’e atu nune’e sira buka tempu ida bele hamutuk atu bele halo debate ne’e ho di’ak.”dehan Prezidente CNE.
José Belo akresenta, informa mós ba Prezidente Repúblika katak ita nia konstitusaun dehan atu sai prezidente Repúblika alende idade 35 iha mós kapasidade natoon, tanba ne’e mak iha biban ida ne’e husi CNE mós sei debate ne’e iha pergunta balun tenke aprejenta ho Portugés no resposta mós Portugés. Atu hatudu ba ita katak ita iha seriu duni, ita hakarak duni lori ita nia rai ida ne’e, ita nia nasaun ida ne’e ba mundu, presija mós kualidade natoon atu nune’e servi ita nia estadu ida ne’e.
Prezidente Republika, Francisco Guterres Lú Olo informa ba CNE katak atividade ritual tradisional ne’ebé CNE realize, ne’e hanesan fatór extra jurídiku. Buat sira ne’e simplesmente atu kaer metin ita nia unidade nasional liuhusi ema ida-idak nia konviksaun. Eleisaun hanesan prosesu demokratiku ida atu tau hamutuk ema, halibur ema la’os atu insulta malu, tanba ne’e mak prezidente Republika husu ba CNE atu tau atensaun ba asuntu sira hanesan ne’e, inklui tratamentu hanesan ba kandidatu sira hotu.
