Reportajen Santina Lucia da Costa
Prezidente Partidu Kmanek Haburas Unidade Nasional Timor Oan (KHUNTO), Armanda Berta dos Santos, ofisiálmente deklara nia kandidatura ba Prezidente Repúblika 2022-2027.
“Ohin loron 20 jJaneiro 2022 hau Armanda Berta dos Santos hakarak hato’o ba publiku kona-ba hau nia kandidatura ba eleisaun Prezidente Repúblika tinan 2022-2027.” informa Prezidente KHUNTO, Armanda Berta dos Santos, iha Salaun Esperansa Delta, 20/01.
Prezidente KHUNTO, Armanda Berta dos Santos hateten nu’udar povu Timor-Leste iha fiar, domin no esperansa hakarak serve ba nasaun no povu tomak iha rai doben ida ne’e, Ita hotu fiar katak, buat hotu sei la’o ho di’ak hodi bele serve ba povu no nasaun Timor-Leste.
“Hau agradese tebes ho suporta tomak hosi povu doben Timor-Leste, liuliu ba hau nia feto maluk sira hosi aldeia to’o nasionál ne’ebé mak fó ona apoiu mai hau, atu sai imi nia Prezidente Repúblika ba nasaun doben ida ne’e.” hateten Armanda Berta.
Armanda Berta mós kompromete ba povu doben Timor-Leste katak, karik eleisaun ba tinan ida ne’e mak povu fó fiar ba nia (Armanda Berta), mak sei kaer metin ba ita nia konstituisaun no prinsípiu fundamental sira hanesan, hametin estadu de direitu demokrátiku, hametin paz no estabilidade atu ita nia dezenvolvimentu bele la’o ba oin ho sustentável, hametin ita nia relasaun di’ak ho nasaun viziñu no mós nasaun sira seluk iha mundu hodi habelar polítika external TL ninian.
Nia hatutan estabilidade iha ita nia rai ida ne’e importante tebes, tanba ne’e ita presiza hatuur didi’ak kompeténsia orgaun soberanu sira nian, ita tenke hametin relasaun inter-independénsia órgaun estadu sira nian ho di’ak no ita presiza governu ida ne’ebé estabil, hodi bele halo dezenvolvimentu iha ita nia rai ida ne’e ba oin.
“Hau hakarak hato’o hau nia komprimisu ba povu doben, hodi hateten ba publiku katak, se karik hau mak eleitu ba Prezidente Republika iha rai doben TL mak sei rejigna-an husi kargu Prezidente partidu KHUNTO.” dehan Armanda Berta.
