Reportajen Adroaldo “Saretukau”
Bainhira eleitu nu’udar Prezidente Repúblika (PR), Dr. Jose Ramos Horta sei halo diálogu ida respeitu ho Parlamentu Nasional (PN), Partidu polítika sira hotu ne’ebé iha asentu ka la iha asentu iha Parlamentu Nasional, kandidatu ne’ebé la pasa ba segunda volta, Sosiedade Sivíl no entidade hotu hodi diskute no solusiona situasaun polítika rai laran ne’ebé akontese ohin loron.
“Ha’u hetan eleisaun (manan) karik, tuur iha Palásiu Nicolau Lobato, Ai-tarak Laran, ha’u hahú kedas diálogu ho Parlamentu, buka sempre, tenki buka diálogu. Diálogu ho respeitu, ba Deputadu sira ho Partidu hotu-hotu ho asentu iha Parlamentu i Partidu sira ne’ebé seidauk tuur iha Parlamentu. Ha’u sei buka diálogu ho kandidatu sira hotu-hotu, kandidatu sira ne’ebé la, buka diálogu ho ita Nia sosiedade sivíl,” Horta promete halo diálogu.
Nia hatutan durante fulan hirak nia laran no tinan hirak liu ba, Horta rona liafuan barak hosi sosiedade sivíl, hosi polítiku sira relasiona ho krize ne’ebé akontese iha ita nia rai laran hahú iha 2018 to’o ohin loron.
“Maibé ha’u sei hakarak rona fila-fali, iha kontextu foun iha Prezidente foun ida. Prezidente ida ne’e sei la buka halo persegisaun ba ema, Prezidente tenki aman ba nasaun tomak, Prezidente tenki rona hotu-hotu, Prezidente labele ema ida hakarak favorese ba Partidu ida de’it ou tau de’it Partidu ne’e nia ema sira iha governu ka iha ne’ebe-ne’ebé” dehan Ramos Horta iha komísiu segunda volta iha Oe-cusse, 02/04.
Diplomata senior ne’e hatete, durante tinan hirak nia laran nia akompaña Xanana Gusmão vizita munisípiu sira ko’alia ho ema barak, rona povu nia sentimentu konabá situasaun ekonomia no polítika iha ita nia rai laran. Tanba ne’e, Horta fiar ho diálogu bele iha solusaun ba situasaun ohin loron nian.
