Reportajen Santina Lucia da Costa
Relasiona ho Eleisaun Prezidensiál ne’ebé iha Primeira rounde, kandidatu Prezidente Repúblika hamutuk na’in 16, maibé ikus mai kandidatu Ramos Horta ho Lú Olo mak hakat ba segundu ronde. Lú Olo hateten, sira na’in 14 maske la mana maibe hela ho dignidade nafatin.
Kandidatu Prezidente Repúblika ho Númeru sorteiu 2, Dr. Francisco Guterres Lú Olo, hateten ida ne’e iha ambitu abertura kampaña segundu ronde iha Gleno, Munisipiu Ermera.
“Kandidatu ami na’in 16 ne’ebé halo kompetisaun iha primeira ronde ida la hakat liu 50+1%, atu bele manan hodi hakat ba Aitarak Laran, sira na’in 14 hela ba kotuk, maibé sira hela ho dignidade nafatin, tanba bele sai kandidatu atu konkorre hodi ba Aitarak Laran ba Prezidente Republika.”Hateten kandidatu PR, Francisco Guterres Lú Olo, iha Kampu Futebol Gleno, Ermera, Sabado, 2/4.
Lú Olo dehan iha primeira ronde numeru sorteiu 6, agora segundu ronde numeru sorteiu 2 no kandidatu numeru sorteiu 14, Ramos Horta agora numeru sorteiu 1, kandidatu na’in rua ne’e mak ba final iha kompetisaun entre na’in rua, ida mak povu fó fiar sei hakat ba Aitarak Laran.
Entretantu hosi rezutadu eleisaun Prezidensial iha Primeira ronde ne’e, Kandidatura José Ramos Horta hetan votu hamutuk 303.477 (46,6%), Francisco Guterres Lú Olo 144.283 (22,1%), Armanda Berta dos Santos 56.690 (8,7%), Tito da Costa Cristovão Lere Anan Timur 49.314 (7,6%), Mariano Assanami Lopes Sabino 47.314 (7,3%), Anacleto Bento 13.205 (2,0%).
Martinho Germano da Silva Gusmão 8.598 (1,3%), Hermes da Rosa Correia Barros 8.030 (1,2%), Maria Helena Lopes de Jesus Pires 5.430 (0,8%), Isabel da Costa Ferreira 4.219 (0.6%), Felisberto Araujo Duarte 2.709 (0,4%).
Constâncio da Conҫeicão Pinto “Terus” 2.520 (0,4%), Rogério Tiago Fátima Lobato 2.050 (0,3%), Virgilio da Silva Guterres “Lamukan” 1.720 (0,3), Antero Bendito da Silva 1.562 (0,2%), no Maria Angela Freitas da Silva 711 (0,1%).
Ho nune’e Totál votu validu iha territóriu Tomak ba kandidatura na’in 16 ne’e, hamutuk 651,859.
