Reportajen Zemila
Asosiasaun Difiensia Timor-Leste (ADTL) parseria ho Australia Pacific Training Coalition (APTC) , hodi organiza atividade espozisaun Karreira ba foinsa’e ho defisiensia atu hare besik liu tan area formasaun ne’ebe posivel ba ema ho defisiensia ho tema “La’ek ba eskluizaun hasoru ema ho defisiénsia iha sentru formasaun no empregu.
Iha ambitu espozisaun Diretor Ezekutivu (ADTL) Cesario da Silva hateten espozisaun ida ho objetivu atu lori hamutuk foinsa’e ho defisiénsia sira, no lori sentru formasaun sira ne’ebe eziste iha rai ne’e, hodi mai hatudu area treinamentu sira ne’e ba ema ho defisiénsia sira ho intensaun, atu sensibiliza sentru formasaun sira, hodi bele sensibiliza sira nia area formasaun.
Nia informa katak numeru foinsa’e ho defisiensia sira ne’ebe tuir formasaun sei minimu tebes, tanba ne’e kontinua nafatin promove sira liu husi espozisaun sira, atu bele enkoraja hodi bele tuir formasaun sira iha area oioin hanesan otelaria, barista, cafetaria, kanalizasaun, soldadura, lian ingles, administrasaun finansas, komputador, jornalismu no area agrikultura.
Iha fatin hanesan Diretora Ezekutivu APTC, Nick Baird hateten Australia Pacific Training Coalition hanesan programa Australia nian iha pasifiku no Timor-Leste atu hametin formasaun professional iha nasaun ida, no buat importante ida tan mak tau importansia ba inkluzivu no sensibilidade iha treinamentu vokasional bo oportunidade ba ema ho defisiensia sira.
“APTC servisu iha Timor-Leste husi tinan 2021, no ADTL sai numeru ida husi ami nia parseria, atu servisu hamutuk hodi hare ba abilidade saida mak ema ho defisiensia sira iha, atu tama ba iha treinamentu vokasionál”, hakotu nia.
Reprezentante Embaixada Australia Ed Wil Kinson , Deputy Embaixadór hateten eventu ida ne’e hanesan inisiativa diak tebes husi ADTL hldi fo tulun no asegura katak atu asesu ba servisu no treinamentu ba maluk ho dizabilidade hodi aumenta liu tan sira nia abilidade.
“Hau kontente tebes bele marka prejensa iha ne’e tama asuntu sira ne’ebe relasiona ho bareira ka difikuldade oioin ne’ebe prevene maluk sira ho dizabilidade atu hetan edukasaun, servisu no oportunidade ekonomia sai hanesan prioriadade ba governu Australia ” deklara nia
Nia hatutan katak programa dezenvolvimentu iha Timor-Leste mak buka atu oferese oportunidade ne’ebe iguál ba maluk sira ho defisiénsia, atu bele partisipa mos hanesan ho seluk no konsidera sira nia potensia no aumenta oportunidade hodi hamenus kiak no atinje kreximentu ekonomia sustentavel.
