Reportajen Joselina dos Santos
Grupu Hametin Manumeta Rai Hun Komunidade Vila-Verde, prontu fó konfiansa ba kandidatu Independente Prezidente Repúblika ho númeru Sorteiu 1, Isabel da Costa Ferreira iha eleisaun períodu 2022 – 2027. Hodi solusiona kauza sosiál oin-oin, ne’ebe maka ema hotu hasoru iha Timor-Leste, tanba sira haree la iha balansu, bainhira iha eleisaun hotu númeru barak sei okupadu hosi mane.
“Iha loron 19 Marsu 2022 (Haktuir ba Decreto Presidente da República nian, N.° 2/2022, 15 Janeiru), ba eleisaun PR. Períodu 2022 – 2027, maka, ami, grupu komunidade Vila Verde, ho konviksaun rasik, mai manifesta publikamente ami ninia prontidaun no apoiu inkondisionál ba Isabel da Costa Ferreira,” Dehan Porta Voz Fatima Cardoso Marques, iha konferensia imprensa ne’e ba jornalista sira iha Manumeta Hun Vila-Verde, 27/02.
Porta Voz Fatima Cardoso Marques hatete tanba sira konxiente katak, iha konjuntura polítika ida daun-daun ema hotu hasoru, kandidatu independente no eto de’it maka bele sai kandidatu alternativa, hodi solusiona kauza sosial ne’ebe mak ema hotu hasoru.
Nia dehan, sira hakarak atu la’o hamutuk ho Isabel da Costa Ferreira, tan nia hanesan lider joven ida no bele hahú atu loke odamatan ba ema hotu, liuliu juventude sira hodi luta ba mudansa.
“Maluk sira hotu, atu luta ba mudansa hodi bele konkretiza duni, ita hotu presiza sakrifísiu, korajen, dedikasaun, voluntarizmu, no vontade atu Reziste, Persiste no Insiste. Tanba la fásil, nune’e mos laós impossível! Atu mudansa akontese duni iha ita nia rai, tenke muda mos ita nia pensamentu, mentalidade no karakter, no mos sai ajente ba mudansa,” dehan Fatima
Nia akresenta, pertinente tebes atu iha istória Timor-Leste nian, liuliu iha momentu krusiál sira hanesan daudaun ne’e, atu sai Prezidente Repúblika ba RDTL tenke ho jéneru Feto ida ne’ebé iha abilidade, kompeténsia integridade koñesimentu, no sai Símbolu ba Unidade Nasionál.
“Tempu ona atu ita hotu eleje feto ba PR, dalan ida oinsá bele promove igualdade jéneru iha Timor-Leste. No ami ninia konfiasan deposita tomak ba Kandidata Isabel da Costa Fereira”, dehan Porta Voz