Reportajen Adroaldo ‘Saretukau’
Kandidatu Prezidente Repúblika 2022-2027, Virgílio da Silva Guterres ‘Lamukan’ ho ekipa prepara ona atu hala’o abertura kampaña eleitorál iha Região Administrativa Especial Ambeno Oe-cusse (RAEOA) entre loron 2-3 Marsu, hamutuk ho povu Oe-cusse oan sira, ne’ebé sei ko’alia liu ba dezenvolvimentu sustentável no prezervasaun kostume Atoni oan nian.
Nia hateten nu’udar kandidatu independete preparadu realiza kampaña sira tuir rekursu no kapasidade ne’ebé iha, tanba kandidatu ne’e nia ekipa susesu sira maioria servisu ho voluntáriu de’it. Nia dehan maske ho rekursu ne’ebé mínimu maibé ho fiar bele lori mensajen kandidatu nian ba eleitor sira hotu.
“Oe-cusse hanesan rai ki’ik ne’ebé iha ita nia viziñu nia rai klaran, nia hanesan símbolu, reprezenta rai boot ni-nian, ema haree Oekusi ne’e ema hatene rai boot ne’e halo nusa. Entaun Oe-cusse nia dezenvolvimentu tenki kontinua la’o, investimentu tenki kontinua la’o, atu nune’e nia bele sobrevive, reprezenta nafatin Timor-Leste ida boot (RDTL) ne’e iha área ne’ebá, ba ita nia viziñu,” hatete Virgílio hafoin prense diretiu de antena iha GMNTV, Segunda, 28/02.
Tanba ne’e sai hanesan Prezidente Repúblika buka apoia nafatin dezenvolvimentu, liu-liu ba hamutuk ho povu iha Oekusi, halo dezenvolvimentu ne’e la’o ba oin, maibé mos konserva, prezerva ita nia uzu kostume tradisaun ne’ebé ke povu Atoni sira sei iha, nia hakotu.