Reportajen Santina Lucia da Costa
Kandidatu Prezidente Repúblika, Númeru sorteiu 12, Virgilio da Silva Guterres “Lamukan” promete bainhira eleitu ba Prezidente Repúblika tinan 2022-2027, nia sei rekomenda ba Governu Sekretariu Juventude no Desportu (SEJD) sai Ministeriu, tanba juventude tenke sai save ba unidade nasional, sé nasaun ne’e iha futuru tenke investe juventude, loke formasaun, formasaun vokasional iha Munisipiu sira.
Iha ambitu kampaña Dialogu, kandidatu Prezidente Republika, Virgilio da Silva Guterres, hateten eleitu ba Prezidente Repúblika, promete rekomenda ba governu eleva Sekretariu Juventude ne’e sai Ministeriu atu nune’e alokasaun orsamentu.
“Ba juventude hau nia promesa mak hau rekomenda ba governu eleva Sekretariu Juventude ne’e sai Ministeriu atu nune’e alokasaun orsamentu ba dezenvolvimentu juventude nian bele boot, duké tau sekretariu ida kuitadu, nia labele halo buat barak, depois sekretariu estadu la’os membru konsellu ministru ne’ebé iha votus, iha ne’eba Ministru mak hola votus hotu, populasaun Timor ne’e maiória juventude kuaze mais 60% entaun tenki iha Ministeriu ida.” hateten, kandidatu Prezidente Republika, Virgilio da Silva Guterres iha Bairu Aetula, Mundu Perdidu, Ossu, Munisipiu Viqueque, 5/3.
Lamukan hatutan depois ita uza juventude sai ornamentu ba diskursu de’it, kuandu diskursu ona juventude mak futuru nasaun ninian, depois sa’e tiha ukun lor-loron ita fó sala juventude mak problema nia hun tanba arte marsiais, osan ba iha ne’ebé.
Lamukan dehan juventude ne’e tenki sai save ba unidade nasional, sé nasaun ne’e iha futuru tenke investe juventude, tenke loke formasaun, formasaun vokasional iha munisipiu sira ne’e atu nune’e sira sai husi formasaun ne’e la’os ba buka serbisu de’I, maibé sira mós bele loke serbisu rasik, auto-emprego,edukasaun ne’e halo ema tenki nia sai husi universidade la’os lori stop-map iha departisaun, maibé nia mós halo serbisu rasik, loke benkel ka halo kooperativa, agro-Turizmu, kapasidade ida ne’e só mai husi formasaun. Entaun governu tenki garante koopera ho misaun katolika no instituisaun relijioza sira atu loke formasaun sira ne’e.
“Bainhira hau eleitu sai Prezidente Republika fó hatene ba Primeiru Ministru, Ministeriu ne’ebé la importansia ne’e lalika ida, sé hakarak fahe ne’e ba Ministeriu agrikultura no Peskas ne’e mak tenki fahe, tanba iha Ministeriu Agrkultas e peskas ne’e lubuk ida mak importante atu hala’o, Floresta nian ema ladun tau atensaun oinsa konserva mundu perdidu ne’e, oinsa konserva sai hanesan ita nia identidade Geolojiku, Biolojiku, ekolojiku, ne’e la tau, to’o rai halai, ema ba sunu rai no ta’a-ai.” realsa, Lamukan.