Reportajen David da Costa Gusmao
Frente Revolusionáriu Timor-Leste Indepedente (FRETILIN), husu ba Comisaun Nasionál Elisoens (CNE), atu hala’o debate ba kandidatu Prezidente Repúblika (PR) sira iha Radio Televizaun Timor-Leste (RTTL.EP), labele iha GMN TV, debate iha RTTL, tanba RTTL nia kobertura ne’e ba Timor tomak.
Ekipa susesu kandidatu Prezidente Repúblika (PR), Dr. Francisco Guterres Lú-Olo, Fernando Dias Gusmão dehan karta ne’ebé hato’o ba CNE, karta protesta ida ligasaun ba planu. atu halo realizasaun debate entre kandidatu PR sira ne’ebé make CNE deside, atu fó responsabilidade ne’e atu hala’o iha kordenasaun GMN TV nian
“Tuir Ami haree katak, debate ne’e podia ita halo iha televizaun RTTL nia kordenasaun ho razaun tanba RTTL nia kobertura ne’e ba Timor laran tomak, e radiu RTTL ne’e bele fó sai kobertura ne’e luan liutan, ita kompara ho GMN TV ne’ebé maka ninia kobertura la boot no la luan hanesan RTTL nian, tanba ida ne’e mak ami protesta ba iha GMN, podia atribui ba ita nia televizaun publika,” informa ekipa tim susesu kandidatu Lú-Olo nian, Fernan Gusmão Liuhosi Komferensia Imprensa Luz Claritas Farmosa, Segunda 7/03.
Nia haktuir liga mós ba kustu ne’ebé mak sei hala’o iha televizaun publika RTTL nia kustu kiik liu, osan sei fila ba kofre estadu, duke kontrata GMN ne’ebé kustu boot liu, no kobertura ladún makaas.
Tanba povu balun ne’ebé iha foho ne’ebá ne’e, sira la iha antena parabola, sira difisil atu asesu ba debate ne’ebé sei hala’o iha dia 15 Marsu ne’e.
“Agora ita hakarak debate kandidatu ne’e povu hotu-hotu bele asesu para sira iha informasaun sufisiente ba programa sira ne’ebé kandidatu sira sei hato’o ne’e, ne’ebé ami hato’o ona karta ba CNE, espera katak bele iha resposta tempu badak,” esplika nia.
Nune’e mós liuhosi via telefone Prezidente Komisaun Nasionál Elisoens (CNE), José Agostinho Belo dehan, CNE hili Grupu Media Nasionál Televizaun (GMN TV) tanba buat ne’e liuhosi kuatasaun no haree ba televizaun ne’ebé kualidade di’ak.
“Ne’e la’ós polítika, ne’e prosedura administrasaun nian, sé mak manan, la manan ne’e kotasaun, agora nusá mak nia ba kestiona fali ida ne’e, ida ne’e tékniku sira mak hatene, nia la manan meman ninia kualidade buat sira ne’ebé la bele, ne’e atu fó manan hanusa, tolu kedas, se maka di’ak maka manan,” esplika nia.
Kotasaun ne’e CNE halo ba televizasaun tolu mak husi RTTL,EP, GMN ho TV Edukasaun, no prosedura liuhusi administrativu CNE nian.