Reportajen Joselina dos Santos
Prezidente Komisaun Nasionál Eleisaun (CNE), Jose Agustinho Belo husu ba eleitór sira iha Timor laran tomak katak, loron aban loron ne’ebe ema hotu hakarak fo votu ba Prezidente Republika ida ne’ebe mak atu lori nasaun Timor ba oin, nune’e aban hahú 7.00h sentru votasaun komesa la’o iha rai laranm no mos iha rai liur tanba ne’e mak husu ba sidadaun hotu hakbesik aan ba sentru votasaun, hodi fo votu tuir idak-idak nia konxiénsia.
“Labele fiar rumoris sira ne’ebe mosu dehan, karik aban ne’e ema indivíduu ka grupu ruma halo impedimentu ruma, ne’e rumoris ne’ebe la loos , fiar ba ita nia seguransa, fiar ba orgaun eleitorál sei la’o ho susesu, “dehan Prezidente Komisaun Nasionál Eleisaun (CNE), Jose Agustinho Belo iha Komunikadu Imprensa ba Jornalista sira iha Salaun Media Center CNE Kolmera, 18/03.
Nune’e iha konferénsia imprensa Prezidente CNE dehan se mak halo ameasa ka impede ruma kona-ba situasaun ne’e, seguransa sei hola medidas, tanba ema hotu hatene katak krime eleitorál ne’e sei kondena sira to’o tinan 3 kastigu.
“Tanba ne’e ha’u husu ba populasaun no eleitor sira katak lalika fiar rumoris, orgaun eleitoral CNE no observadór internasionál sira supervizaun másimu, tanba ne’e husu ba ita hotu mantein nafatin pozisaun, hatudu ita nia maturidade no responsabilidade tanba ita hotu hakarak halo morin Timor nia naran iha rai laran no mos rai liur,” Dehan Prezidente CNE
