Reportajen Francisco Colo
Ekipa susesu Antero Benedito da silva ho numeru sorteio 10, senti insatisfaz ho servisu STAE nian ne’ebe la konsege asegura prosesu votasaun ba sidadaun hotu, tanba militantes rihun 2.000 la ezerse sira nia direitu hodi vota.
“Ami lamenta tebes, tamba, ami nia militantes, maioria universitariu besik rihun-rua (2.000) iha Dili mai husi munisipiu Baucau, Lospalos, Vikeke, Suai ho Manufahi, inklui militantes besik 30 iha Ospital referal Baucau labele ezerse sira nia direitu de votos nudar sidadaun.” Dehan liuhusi karta komunikandu imprensa Fernando Ximenes Reprezentante Ekipa Susesu, Dr. Antero Benedito da Silva 19, Marsu 2022 Rafa, Dili, Timor-Leste Kandidatu Independente, Eleisaun Prezidensial 2022-2027.
Ekipa susesu nota katak falta koordenasaun, servisu inefetivu no iregularidade ne’ebe komete husi STAE nune’e:
- Naran ne’ebe rejistu ona maibe la mosu lista votantes sentru paralelu STM, GMT no INAP
- Iregularidade ne’ebe mosu, hatudu votante naran iha, maibe STAE dehan laiha
- Ami nia votantes iha ospital Baucau ne’ebe labele ezerse sira nia direitu tan la konsege rejistu
- Ami nia militante labele vota, tan protokolu Covid-19 hatauk ami nia militante iha Manleu labele vota
- Agresaun husi oknum siguransa PNTL balun ne’ebe komete aktu agresivu hasoru militante balun ne’ebe halo protestu eziji nia direitu de vota iha STM
“Ami konklui katak, ne’e laos deit problema STAE-CNE nia falta kordenasaun ka inefitividade, maibe iha tentativa sistematiku hodi impede ema kiak sira hodi fo votus ba kandidatu independente, liuliu ami nia kandidatura numeru 10.” Afirma nia iha komunikandu Imprensa ne’e.