Reportajen Zevonia Vieira
Kandidatu Prezidente Republika, Dr. Francisco Guterres Lu Olo hato’o nia apresiasaun ba partisipasaun sidadaun hotu ne’ebe partisipa iha eleisaun loron 19 Marsu.
Liuhusi komunikadu imprensa ne’ebe Neon Metin asesu informa katak kandidatu Francisco Guterres Lú Olo hakarak apresia partisipasaun sidadaun hotu-hotu ne’ebé ohin, 19 Marsu, ezerse sira-nia direitu sivíku, hili sira-nia kandidatu sai Prezidente Repúblika ba periodu 2022-2027. Eleisaun ohin nian iha Timor-Leste laran tomak no iha rai-liur la’o ho hakmatek. Ne’e hatudu maturidade polítiku povu nian husi loron ba loron sa’e babeibeik.
Kandidatu Lú Olo apresia serbisu sira husi orgauns eleitorais Sekretáriu Tékniku Administrasaun Eletorál (STAE) no Comissão Nacional de Eleições (CNE), ne’ebé organiza no halo supervizasaun ba eleisaun Prezidente Repúblika atu sidadaun hotu-hotu bele ezerse ninia direitu ba tuir votasaun.
Sidadaun ida-idak ezerse ona ninia direitu ba vota, ita hotu akompaña hela prosesu kontajen votus nian. Kandidatu Lú Olo husu atu timoroan hotu-hotu bele tuir kontajen votus no fó fiar tomak ba orgauns eleitorais ezerse sira-nia funsaun ba kontajen votus no apuramentu to’o entrega rezultadu ikus ba Tribunal Rekursu. Tribunal Rekursu mak sei anunsia rezultadu final ba eleisaun Prezidente Repúblika.
Ohin, Kandidatu Lú Olo akompaña ho preokupasaun sidadaun balun reklama iha sentru votasaun paralelu iha Díli tanba sira-nia naran la tama iha lista eleitoral atu tuir votasaun. Kandidatu Lú Olo lamenta ho fallansu servisu tanba sidadaun balun lakon sira-nia direitu atu vota ohin. Ida ne’ e fallansu akontese iha periodu preparasaun ba eleisaun prezidensial, maibé seidauk bele konsidera ida ne’e nu’udár irregularidade atu eleitoral ida. Foin primeira vez mak Timor-Leste harii sentru votasaun paralelu atu permite eleitor sira bele vota iha fatin ne’ebe sira estuda, servisu ka hela en-ves-de fila ba munisipiu ida-idak nian. Sistema foun ida ezije meius komunikasaun no liña koordenasaun diak entre STAE no ajentes implementasaun to’o nível suku.
Kandidatu Lú Olo apela ba STAE atu hare problema sira ohin loron nian nu’udár lisaun atu bele organiza dia’k liutan sentru votasaun paralelu sira iha Díli hodi garante direitu votu ba sidadaun hotu-hotu iha eleisaun sira iha tempu tuir mai.
