Reportajen Umbelina dos Reis
Parlamentu Nasional (PN), ohin liuhosi reuniaun plenáriu extraordinariu, iha loron 25 fulan Novembru tinan 2024, halo’o votus de pesar ba , antigu ativista no eis Jornalista Titi Irawati Supardi ho rezultadu votasaun 54 a favor, 0 kontra no 0 abstensoens.
Ativista Titi moris iha Yogyakarta, Indonézia, 16 Outubru 1955. Tinan ida hafoin kontinua nia estudu iha Fakuldade Psikolojia Universidade Gadjah Mada (UGM), Titi hahú envolve-an iha movimentu anti rejime ditadura Suharto desde 1976. Nia partisipa iha manifestasoins, liuliu iha Dewan Mahasiswa (Konsellu Estudantes) UGM no Gerakan Mahasiswa Nasional Indonesia (Movimentu Estudante Nasionál Indonézia – GMNI). Iha 1978 bainhira militár Indonézia harahun movimentu estudantil, Titi tenke subar tanba nia atividade iha GMNI.
Hafoin remata nia estudu psikolojia iha UGM iha 1983, Titi muda ba Jakarta hodi serbisu nu’udar jornalista. Titi serbisu nu’udar jornalista iha revista feto, ho naran Sarinah to’o tinan 1995. Iha Jakarta, Titi kontinua envolve iha atividade kontra rejime Orde Bari nu’udar jornalista, ho espíritu ativista no konxiénsia polítika ne’ebé nia hetan iha universidade, aivista Titi halo kontaktu ho organizasaun naun-governamental sira ne’ebé luta ba direitu povu nian hasoru rejime ditadura Suharto.
Organizasaun naun-Governamental ne’ebe Atvista Titi Irawati Supardi kontaktu maka Kalyanamitra, Yayasan Lembaga Konsumen (Fundasaun ba Direitu Konsumidores – YLK), Solidaritas Perempuan (Solidaridade Feto), Wahana Lingkungan Hidup (Institutu Meiu Ambiente – WALHI), Yayasan Lembaga Bantuan Hukum Indonézia (Fundasaun Institutu Asisténsia Legal Indonézia – YLBHI), Lembaga Bantuan Hukum (Institutu Asisténsia Legál – LBH) ihq Jakarta.
Aleinde iha ligasaun, Atvista no eis jornalista Titi sai voluntáriu ba organizasaun sira ne’e nu’udar kontribuisaun ba luta hasoru rejime Suharto ba realizasaun demokratizasaun iha Indonézia.
Votus de pesar homenajen ba ativista no eis jornalista Titi Irawati Supardi hanesan rekoñesimentu ida hosi Timor-Leste ba kontribuisaun luta ba libertasaun nasionál ne’ebé harii ona iha estadu ida ne’e.
Reuniaun plenária ne’e preside hosi Prezidente Interinnu Parlamentu Nasional, Maria Terezinha Viegas no akompaiña hosi membru meza.
