Reportajen Filomena da Conceição
Autoridade Lokál husi Suku Catrai-Craik, Postu Administrativu Lete-foho, Munisipiu Ermera, husu ba vizitante hirak ne’ebe mak ba vizita fatin turistiku bee matan Dadil tenke hadomi ambite no labele so’e foer arbiru iha bee matan Dadil, tanba bee refere hanesan bee natureza no komunidade sira uza hodi konsumu.
“Ami kria regra ba vizitante sira katak banhira ba vizita be matan Dadil tenke iha Karta koinesementu, tanba tinan kotuk vizitante barak hanesan joven sira mak mai vizita fatin hirak ne’e, maibe la kuidadu ambiente no so’e foer arbiru iha bee matan no sira haris no fase oin fali iha bee matan nia laran”, dehan Autoridade lokál, Carlos Soares , ba jornalista sira iha sede Suku Catrai-Craik, Kuarta 21/11.
Nia husu, vizitate sira ne’ebe vizita fatuk Dadil tenke liuhusi Suku Catrai-Craik no iha karta koinesementu ruma husi sede suku hodi bele sai hanesan argumentu ba suku, atu Autoridade suku dira bele hatene, hodi bele tau matan lisuk ba fatin turistiku sira ne’ebe vizitante sira mai vizita.
“Ami mos iha tara bandu ida ba vizitante sira ne’ebe vizita fatin Turistiku iha iha suku Catrai-Craik nain no liuhusi tarabandu neie la signifika katak ami la hatan vizitante sira atu mai, maibe pelumenus iha karta rekoinsimentu ruma atu ami bele hatene hodi fo netik regra ruma atu sira bele kuidadu fatin sira ne’e”, Nia esplika.
Tanba ne’e, vizitante hirak ne’ebe vizita fatin turizmu bee matan Dadil tenke tuir regulamentu husi suku Catrai-Craik ka nain ba fatin turistiku refere, tenke respeita no valoriza nafatin fatin istoriku sira tanba independensia ne’ebe Timor-Leste hetan sura mos natureza sira Timor nian.
Nia Esplika fatin refere ema bolu be matan Dadil, tanba bee matan ne’ebe mosu iha fatuk ne’e nia leten no entre fatuk sira ne’e, iha fatuk ida ne’ebe lian hanesan Dadil nia lian, tanba ne’e mak ema hanaran bee matan Dadil.
“Istoria be matan Dadil ne’e hanesan ne’e, bee ne’e moris rasik iha fatuk leet, no sai bee matan ba Uma lisan 4 no bee ida ne’ebe moris rasik iha fatin refre no ita la hatene oinsa nia bele moris iha fatin ne’e, maibe ne’e moris desde beiala nia tempu, no bolu bee Dadil, tanba iha ne’ebá fatuk ida ne’e, lian makaas hanesan Dadil nia ka lian hanesan sinu, tanba ne’e mak bolu be matan Dadil,” nia esplika liu tan.
Entretantu, bee matan Dadil hanesan fatin istoriku no turistiku ida ne’ebe kada tinan vizitante barak mak ba vizita no fatin refere lokaliza iha suku Catrai-Craik, Postu Administrativu Lete-foho Munisipiu Ermera.
Progama media tour ne’e realiza tanba Asosiasaun Jornalista Timor Lorosa’e (AJTL), servisu hamutuk ho OXFAM Iha Timor-Leste no hetan apoiu fundus husi Oxfam Hongkong.
