Reportajen Joselina dos Santos
Kandidata Prezidente Repúblika ho numeru Sorteiu 1, Isabel da Costa Ferreira, la depende ba povu nia eskolla, maibé hakarak sai Prezidente ida ne’ebé mais prósimu, hodi liberta povu husi kiak no terus iha nasaun ida ne’e.
Hafoin remata vota, kandidata Prezidente Repúblika, Isabel da Costa Ferreira hateten ohin loron 19 Marsu ema hotu mai ezerse nia direitu ba Prezidente Repúblika nia espera, povu halo desizaun ne’ebé lo’os no diak, atu eskolla Prezidente ida ne’ebe mak hadomi povu, atu tau matan ba povu no rai ida ne’e, para bele liberta povu husi terus no ki’ak.
“Ba povu dezeju ke eleisaun la’o ho diak, para ita bele hetan rezultadu di’ak, no ita nia hakarak saida deit Timor oan hotu tenke simu,” dehan Kandidatu Prezidente Repúblika, Isabel da Costa Ferreira ba jornalista iha Sentru votasaun Metiaut, 19/03.
Nia dehan nia la depende ba povu nian eskolla, se nia eleitu hakarak Prezidente ida mais prósimu, Prezidente ida ne’ebe besik povu no hamutuk ho povu ki’ak sira, liu-liu ajuda sira nia oan sira, atu hetan oportunidade ba eskola no empregu, tanba eskola no matenek bele muda sira-nia vida, muda familia no muda nasaun.
“Hau nia esperansa ba elisaun ida ne’e, la’o ho diak ita hotu hein katak simu rezultadu saida mak povu sira nia hakarak,” nia dehan