Reportajen David da Costa Gusmao
Kandidatu Prezidente Repúblika (PR) Virgílio Da Silva Guterres “Lamukan”, ho numeru sorteiu 12, ohin ezerse ona nia direitus votu iha aldeia Bairo Formosa, Suku Gricenfor, postu nain Feto Dili, no kandidatu ne’e konsidera eleisaun ne’e laos manan ka lakon, maibe ida ne’e prosesu polítiku ida ne’ebe sai hanesan formasaun politiku ba sidadaun hotu.
“Hau kontente tanba eleisaun tinan ida ne’e, hau hanesan kandidatu ida, hau iha hanoin ida katak elisaun ne’e laos manan ka lakon, ida ne’e hanesan prosesu politiku ida ne’ebe-ke sai hanesan formasaun politika ba ita nia sidadaun hothotu,” dehan kandidatu Prezidente Repúblika, Virgílio da Silva Guterres, bainhira partisipa, eleisaun iha Gicenfor formosa, sabadu 19/03.
Kandidatu ne’e konsidera katak sei vota mai rezultadu ne’e mai la liu, por que seidauk iha kapasidade atu konkista votus hosi povu ne’e maka seidauk natoon, entaun ida ne’e sai referensia ida. Mas importante ba iha eleisaun ne’e maka ema hotu tenke ezerse nia direitu de votu, i ba tinan ida ne’e eleisaun prezidensiál ne’e deferénsia boot, tanba kandidatu barak mas kandidatu ne’e barak jerasaun foun.
“Ho ida ne’e hau mós hola parte ida iha kandidatu ida ne’e, signifikadu polítiku boot ba hau iha eleisaun ida ne’e. Mas ema konsidera eleisaun ida ne’e hanesan jogu manan ka lakon, ida ne’e kandidatu prefere lakon ho dignu duke manan ho moe. Entaun konaba manan ka lakon, depois maka ita haree iha rezultadu, hau preparadu atu haree rezultadu saida deit,” nia haktuir.
Kandidatu ne’e hatete, fiar aan tenke manan, mas mós tenke realista oituan atu simu realidade, tanba iha konfigurasaun politika ho jerasaun tuan sira.“Sae tan hau hanesan kandidatu independent ne’ebe ninia rekursu atu mobiliza masa atu konkista votu no kampaíña, la hanesan ho kandidatu sira seluk ne’ebe maka apoiu hosi partidu politiku”.
Nune’e mós haree ema analiza ba votu rasionais no irasionais, entaun ho públiku ne’ebe maka sei barak dependente ba figura, depois mos istória faktor sira ne’e maka sei determina iha rezultadu.
“Ba hau nia improtansia maka, hau hola parte iha prosesu ne’e nia laran, se uluk hau hili ema seluk, agora hau tenke obriga hili hau nian aan,” tenik nia.
Tuir observasaun jornalista Neon Metin iha térenu, kandidatu Prezidente Republika (PR) Virgílio Da Silva Guterres “Lamukan”, ho numeru Sorteiu 12, to’o iha fatin votasaun Gircenfor iha tuku 9 liu minutu balun no akompaiña husi nia eskultu nain tolu.
Nune’e mós iha sentru votasaun ne’e, sidadaun hotu entuziazmu, forma liña hodi ezerse nia direitu hodi hili sira nia kandidatu Prezidente Republika. Iha fatin votasaun ne’e iha asisténsia hosi fiskais, STAE, observadór Nasionál, Internasionál, Brigada hosi kada kandidatura sira nian, iha sentru votasaun ne’e hetan seguransa másimu husi Polisia Nasionál Timor-Leste (PNTL).
