Reportajen David da Costa Gusmao
Governu liu husi Sekretáriu Estadu Juventude no Desportu (SEJD) halo vizita kortejia ba grupu integradu tolu iha suku Foho-Ailiko, postu-Administrativu Hatu-Udo munisipiu Ainaro.
Grupu integradu tolu mak hanesan Babulu hakiak manu, Grupu kriatividade produtivu no Hadomi produtu lokál iha Timor-Leste.
Sekretáriu Estadu Juventude no Desportu (SEJD) Abrão Saldanha hateten bazeia ba atividade ida ne’e, governu halo estímulu emprendedorismu sosial iha agrokultura, pekuária, peska no turizmu sira iha Timor-Leste.
“Ohin mai vizita kortezia iha fatin ida ne’e atu nune’e bele hare no observa ba iha ita nia joven sira nia atividade ne’ebé mak durante sira halo ona iha sira nia suku, atu nune’e iha tinan ida ne’e ami halo programa iha sentru juventude ida iha Ainaro, nune’e bele ajuda joven iha suku sira, hodi hare sira ne’ebé ho inisiativa rasik, hodi kria atividade rasik iha sira nian rain rasik,” dehan SEJD iha suku foho-Ailiko, Ainaro, Tersa 10/08.
Iha fatin hanesan Koordenador Grupu Haburas Foho-Ailiko Juvinal dos Santos hatete grupu ne’ebé mak sira harii, hanesan grupu habokur karau, ne’ebe harii iha tinan 2019 to’o ohin loron.
“Ami nia grupu ida ne’e dahuluk halo atividade social no ami serbisu hamutuk, ami fiar malu hodi hari’i grupu ida ne’e ho naran Habokur Karau, tanba ne’e ami kuaze 37 mak hari’i grupu ida ne’e, atu nune’e bele sustenta ami nia ekonomia uma laran nian,” dehan Juvinal.
Nia konfesa katak durante sira hari’i grupu ida ne’e ho inisiativa rasik, hanesan agrikultór la hetan apoiu husi governu, ho ida ne’e sira kontinua halo kréditu iha banku BNCTL atu nune’e haboot sira nia grupu ne’e.
Husi atividade fa’an karau ho folin $6000, nune’e orsamentu ne’ebe hetan fahe ba rua, nune’e karau nain nian $3000 no grupu ne’e investe $3000.
Iha tinan ida nia laran grupu ne’e konsege fa’an karau hamutuk 52, ho orsamentu hamutuk $37.500. Aleinde sira kria grupu habokur karau, iha mós atividade kuda batar, fore-rai no seluk tan.
Entretantu atividade ne’ebe sira halao, sei hamosu preokupasaun ne’ebe sira hasoru mak hanesan bee moos, ai-han fo han karau, inklui ekipamentu sira, nune’e sira hato’o pedidu ba sentru juventude Ainaro, atu bele fo apoiu fundu kiik ba sira.
Kreditu ne’ebe sira iha BNCTL kada membru ho orsamentu $500, nune’e total orsamentu ne’ebe BNCTL oferese hamutuk $18.000, husi kreditu ne’ebe sira halo, grupu ne’e foin selu $4000
