Reportajen Silvino Freitas
Kandidatu kadete foun Polisia Nasional Timor Leste (PNTL) 2025 neebe admitidu ba teste mediku maibe la tuir teste junta forsa husi Estudante Universitariu Timor Leste (EUTL) sei halo asaun pasifika hasoru Primeiru Ministru IX Governu Konstituisional Kairala Xanana Gusmão no Ministeriu Interior Francisco Guterres bainhira laiha desizaun tuir karta neebe sira submete ba Parlamentu Nasional no Primeiru Ministru katak atu halo anulasaun total ba prosesu rekrutamentu no kria fali komisaun foun tanba komisaun anterior nee kria injustisa no diskriminasaun boot.
Portavoz Kandidatu Kadete Foun Tito Orleans dehan, reafirmasaun pozisaun husi kandidatu kadetes foun PNTL tinan 2025 nian tuir karta neebe sira submete ona ba parlamentu nasional no primeiru ministru atu halo anulasaun total ba prosesu rekrutamentu kadete foun nian neebe dadaun nee suspende ona, nunee estabelese fali komisaun indepedente ida husi internasional atu halo fali selesaun tanba komisaun ida antes halo rekrutamentu nee kria injustisa social no halo mos diskriminasaun boot ba sidadaun sira.
“ami nia pozisaun mak junta forsa ho EUTL hodi halo vijilansia ba prosesu neebe suspende ba loron 20 nia laran, nunee karik desizaun mak la tuir ami nia hakarak mak ami sei halo ultimu rekursu mak manifestasaun hasoru ministeriu interior no primeiru ministru” dehan Portavoz Kandidatu Kadete Foun Tito Orleans liuhusi konferensia imprensa iha kampus sentral UNTL, (26/02).
Nia dehan tan, iha diploma ministerial neebe hasai husi ministeriu interior hodi halo rekrutamentu ba kadetes foun tinan 2025 nian halo traisaun boot ba povu no sidadaun, nunee husi sira nia parte mak kontra sistema neebe uza hodi halo rekrutamentu laos sujeitu ruma, tanba nee atu prevene no kombate sistema diskriminativu sira hanesan nee atu labele akontese tan iha futuru, nunee sira husu ba ministeriu interior Francisco Guterres no primeiru ministru Kairala Xanana Gusmão atu toma desizaun neebe adekuadu hodi anula total.
“ami husu ba primeiru ministru no ministeriu interior atu toma desizaun neebe adekuadu tenke anula total tuir ajijensia neebe ami hatama ona karik la anula total mak ami sei halo asaun pasifika hasoru ministeriu interior no primeiru ministru” dehan Portavoz Kandidatu Kadete Foun Tito Orleans.
Entretantu Portvoz EUTL Natalisio Nunes reforsa tan, desizaun neebe konsellu ministru hasai ona nee atu halo suspensaun iha loron 20 nia laran hodi halo verifikasuan ba iregularidade neebe akontese iha prosesu rekrutamentu neebe dadaun nee publiku kestiona makaas, maibe karik la indetifika maka kadidatu sira neebe liu ona ba teste mediku tuir numeiru kuota munisipiu nian sei kontinua halo teste mediku, tanba tuir ejijensia neebe kandidatu kadetes foun hatoo atu anula tanba tuir provas neebe sira ejiji katak kandidatu sira neebe atu ba tuir teste mediku iha numeiru kuota munisipiu nian nee maioria PNTL nia oan.
“desizaun nee suspende temporaria deit atu sira halo verifikasuan atu hatene maioria PNTL nia oan ka laos, maibe tuir faktu balun neebe hautudu iha terenu maioria pntl nia oan duni signifika katak temporaria nee kuandu husi verifikasaun mak hatudu katak laiha iregularidade mak sira nain hira nee bele liu ba teste mediku” dehan portavoz EUTL Natalizio.
Portvoz EUTL Natalisio Nunes konklui katak, iha loron 20 nia laran tenke iha desizaun neebe adekuadu no proporsional tuir ejijensia kadetes foun nian atu halo anulasaun total ba prosesu rekrutamentu no halo revizaun komisaun rekrutamentu hodi bele garantia funsionamentu neebe transparansia prosesu rekrutamentu iha instituisaun PNTL nia laran, no garante katak prosesu rekrutamentu nee labele hamosu diskriminasaun no kontra kontituisaun tanba konstituisaun mak lei inan neebe regra no desizaun hotu tenke komprimenta.
