Reportazen Francisco JDA
Timor-Leste Coalition for Education (TLCE) preokupa desizaun deputadu hosi Bankada Governu FRETILIN, PLP, KHUNTO ne’ebé boikota planu inovativu hosi Ministeriu Edukasaun Juventude no Desportu (MEJD) kona ba oportunidade ba estudante sira, atu kontinua aprende mesmu iha situasaun krize pandemia COVID-19 nia laran
Liu hosi komunikadu imprensa ne’ebé Neon Metin asesu tuir Koordenador TLCE, José Monteiro sita katak programa eskola ba uma nudar instrumentu di’ak liu bele realiza iha krize pandemia COVID-19, estudante sira bele aprende iha parte ida no kontinua kumpri protokolu saúde nian.
“Estudu Avaliativa husi TLCE nian iha fulan Abríl 2020 hatudu katak iha reasaun pozitivu husi estudante no inan aman sira mesmu iha 23%, nivel partisipasaun eskola nia iha programa eskola ba uma. Presiza mós tau iha konsiderasaun relatoriu survei ida ne’ebé The Asia Foundation hala’o iha fulan Maio, hatudu katak programa eskola ba uma nia eligibilidade atinji 66% no nivel satisfasaun atinji 47%,” hatete José Monteiro liu hosi komunikadu imprensa ne’ebé Neonmetin Asesu, 23/04
Koordenador TLCE afirma tan, programa eskola ba uma ne’e la la’o mesak, maibé akomponha mós ho distribuisaun livru ba estudante sira iha area remotas, meius hirak ne’e MEJD introduz hodi kria nafatin oportunidade ba estudante sira atu aprende.
“Nain deputadu sira la iha dadus ne’ebé sai fundamentu sufisiente atu rezeita planu MEJD nian, hodi hadiak liu tan programa inovativu uniku no nesesariu tebes hanesan programa eskola ba uma, tanba iha situasaun pandemia COVID-19 ejize ita hotu nia asaun koletiva, nune’e deputadu sira bele aprezenta idea seluk ne’ebé di’ak liu ba MEJD, atu hala’o tuir hodi garante oportunidade, nune’e estudante sira kontinua aprende no la haluha responsabilidade sira nu’udar estudante,” hatete Koordenador TLCE José Monteiro
