Reportazen Zevonia Vieira
Tauk no preokupa, hakilar no halai ses hosi uma, tanba udan tun boot ba bebeik, anin boot ne’ebe harahun uma sira, halo ema vulneravel barak hasoru susar, ne’ebe hahu iha oras tuku 02:00 madrugada iha loron 4 Abril.
Idak-idak salva nia an hodi halai, labarik kiik, inan feto isin rua, katuas, ferik no ema ho difisiensia sira mak sai vulneravel liu.
Neon Metin dadalia ho Eduardo Tilman moris nudar ema ho difisiensia ain, nia serbisu iha organizasaun deifisiensia Ra’eS Hadomi Timor Oan (RHTO) mos afeta ba inundasaun ne’ebe akontese iha madrugada oras tuku 02:00 dadersan.
Teki-teki bee komesa tama ba nia uma laran, nia lahatene oinsa atu salva nia fen no oan nain rua ne’ebe sei kiik hela, nia la iha kbiit atu salva sira, tanba situasaun difisiente ne’ebe iha.
“Ajuda lai..ajuda lai…ajuda lai….hau dolar ba tur iha motor roda tolu, ne’ebe hau uza, motor ba ema ho difisiensia nian…hau hakilar husu ajuda, atu nune’e vijinhu sira mai ajuda. Kolega sira mai duni hodi evakua ami no lori ami ba foho leten”, tenik Eduardo ho oin triste relembra fila fali dezastre naturais ne’ebe afeta ba nia familia.
Eduardo konfesa, kondisaun difisiensia susar ba nia atu salva nia familia, maibe nia haksolok tanba vinjihu sira hatudu nia solidariedade hodi salva sira iha situasuan defisil ne’ebe sira hasoru. Iha kalan boot bainhira udan seu tun makaas ho anin boot, Edurado ho nia familia no sira seluk konsege hakat liu hodi iha foho leten.
“Mota Comoro mai hosi Manleu nian, besik uma ne’e moru iha, entaun bee harahun moru ne’e no komesa tama mai ona, ami hanoin udan mai hanesan babain. Ami vijinhu sira mai dere odamatan, ami sai mai bee nakonu ona. Momentu ne’e bee komesa sae ona, entaun hau tur iha motor leten ba ema difisiensia nian. Hau hakilar dehan ajuda lai, ajuda lai entaun vijinhu sira halai mai, ajuda ami foti sai”, tenik Eduardo iha fatin evakuasaun Salao Dom Bosco Comoro, ba Neon Metin 04/03.
Situasaun iha salao Dom Bosco ne’ebe nakloke, komunidade sira hanesan ema ho difisiensia sira, inan isin rua, ferik ho katuas no labarik sira, tau hamutuk iha fatin luan ne’e, nune’e bele satan netik sira hosi inundasaun no udan ne’ebe kontinua tun.
Neon Metin observa katak iha labarik barak mak sei bebe, hasoru risku iha sira nia moris, kahur hamlaha, hamrok no malirin tanba durante loron ida tomak sira labele han, la toba no la truka ropa. Sira han los deit mie instant kahur bee manas, hodi kasu sira nia hamlaha. Ba situasaun ne’e mie instant bikan ida mos bele salva ona sira hosi hamlaha, maibe oinsa labarik kiik sira, ne’ebe sei presiza ai-han nutritive sira? oinsa sir abele toba duku iha situasuan susar ne’e?
Eduardu husu ba governu ho situasuan moras COVID-19 ne’ebe afeta mos Timor, maibe nia governu atu mos halo esforsu hodi responde nesesidade komunidade sira ne’ebe afeta hosi inundasaun ne’ebe konsege halo ema mate iha oras balun nia laran.
“COVID-19 iha Timor sedauk konsege oho ema, maibe inundasaun sura deit iha oras ida nia laran konsege oho inan feto, labarik, aman no jovem balun”, tenik Eduardo
Eduardo mos dehan dezastre naturais ne’e fo impaktu boot liu ba ema ho difisiensia sira, oinsa atu salva an.
“Agora dadauk ami presiza bee moos ba labarik sira atu hemu, ropa hahan no susuben ba labarik sira no aimoruk”, hateten Eduardo
Cruz Vermelha ho nia ekipa konsege evakua Eduardo ho nia familia no komunidade sira seluk, hodi lori ba iha salao Dom Bosco
