Reportajen David Costa
Assosiasaun Jornalista Timor Lorosa’e (AJTL) Servisu hamutuk ho Oxfam iha Timor-Leste hodi organiza Media Tour Ba Jornalista sira husi Media sira iha Timor-Leste hodi ba halo kobertura iha Munisípiu Ermera hodi foka liu ba iha asuntu “Haforsa Lian no Kreatividade Foinsa’e Inkluzivu”.
Prezidente Assosiasaun Jornalista Timor Lorosa’e (AJTL), Zevonia Vieira hateten, Media Tour ne’ebé mak sei halo ne’e, sei koa’lia liu kona-ba haforsa Lian no Kreatividade Foin Sa’e Inkluzivu, ne’ebé mak sei hala’o iha Munisípiu Ermera. Oinsá atu promove setór produtivu sira ba diversifika ekonomia iha Timor-Leste.
Ho ida ne’e, AJTL foti papel ida ne’e hodi jornalista sira ba vizita joven no grupu sira iha area rural hodi foti sira nia istória susesu ka obstaklu ne’ebé mak sira hasoru, ida ne’e hanesan advokasia ida ba governo no parlamentu, oinsá mak sira bele foti solusaun, no oinsá mak governu kontinua apoiu joven sira ne’e hodi bele kontinua setór produtivu sira hodi diversifika ekonomia iha rai laran.
“Governu atu tau prioridade ba setór produtivu sira, joven sira ne’ebé mak motiva sira nia an, sira la hein no sira hahú ona, oinsá mak governu bele tau importansia hodi fasilita sira,” Dehan Prezidente AJTL, Zevonia Vieira, iha Workshop Média Tour iha salaun Oxfam Hudi-laran, Díli, Tersa 16/04.
Nia haktuir, Média advokasia ne’e importante los atu aproxima governu hodi preoritiza ba iha setór produtivu sira, nune’e governu bele hare’e saida mak joven sira halo ona ba rai ida ne’e. Tanba ne’e Jornalista sira sei ba Ermera hodi vizita joven produtivu sira iha setór Agrikultura, Turízmu no Sesional works program.
Iha fatin hanesan, Reprezentante Oxfam iha Timor-leste, Jude Perera, hatutan, AJTL ho Oxfam halo kobertura iha area rural sira, ida ne’e hanesan oportunidade ida diak tebes, tanba kria espasu hodi halibur informasaun kona-ba foinsa’e sira nia kreatividade no sira nia investimentu ba iha setór agrikultura no setór produtivu sira seluk.
Tanba husi Media Tour ida ne’e, bele promove potensia no koñesementu ne’ebé sira iha hodi kontinua fahe informasaun sira ne’ebé husi baze hodi informa ba ukun nain sira bele hatene saida mak joven sira halo iha area rural, potensia saida mak sira iha no saida mak governu presiza apoiu ba sira.
Nune’e mós Diretór Diresaun Nasionál Empregu Estranjeiru (DNEE sigla português), João Correia Perreira, mos hateten, hanesan joven foin sa’e oinsá atu garante joven ho idade produtivu sira iha oportunidade ba servisu iha rai liur, Tanba DNEE iha papél importante ida ne’eba maka responsabilidade ba promosaun no jestaun programa sira hodi rekruta no koloka traballadores Timoroan sira ba merkadu traballu iha rai liur.
“Ha’u hanoin iha nasaun ida atu la’o ne’e laos ema ida ou rua de’it, foin sa’e hotu-hotu iha papel no oportunidade servisu iha area saida de’it atu dezenvolve asuntu saida mak importante ba joven sira,” Nia dehan.
Programa Media Tour ne’e hetan apoiu fundus husi DFAT ka governu Australia liuhusi projetu Prosivu, no kolabora ho Oxfam iha Timor-Leste.
