Reportajen Joselina dos Santos
CNE halo tiha ona apuramentu nasionál durante oras 72 nia laran tuir lei haruka. Rezultadu apuramentu nasional la halo ba votu sira hosi centru votasaun iha Portugal, Korea, Irlanda no Inglaterra.
Komisariu Komisaun Nasional Eleisaun (CNE) nian, Jose Belo hato’o iha konferénsia imprensa dehan katak tempu legal liu ona, no sasan sira hosi Portugal, Korea, Irlanda no Inglaterra seidauk to’o Timor-Leste.
“Apuramentu nasional ne’e halo deit ba centru votasaun sira iha rai laran no mos hosi Australia. Votus hosi centru votasaun iha Portugal, Korea, Irlanda, no Inglaterra la konsege halo apuramentu tan ultrapasa ona tempu legal mak iha no sasan sira seiduak to’o mai Timor-Leste”, Komisáriu Jose Belo hato’o iha konferensia imprensa ohin, 25 Marsu, iha CNE.
Eleisaun Prezidensiál halao tiha ona iha 19 Marsu 2022, no kontajen de votus halo kedas iha centru votasaun sira no iha nivel munisipiu, depois ida ne’e rezultadu haruka mai CNE hodi halo apuramentu nasional.
Tuir lei eleisaun nian, apuramentu nasional halo durante oras 72 nia laran. Ohin CNE konklui ona apuramentu nasional no sei iha oras 72 nia laran tan ba CNE hodi halo plenariu no elabora akta. Bainhira akta pronto ona sei publika hodi hein karik iha reklamasaun ruma durante oras 24 nia laran. Bainhira la iha reklamasaun CNE sei hatama rezultadu apuramentu ho akta ba Tribunal Rekursu hodi halo validasaun.
Rezultadu publika iha iha website CNE kontinua hatudu katak la iha kandidatu ida mak hakat liu 50%. Kandidatu ho votus boot liu mak Dr. Jose Ramos Horta ho votus 302710 (46,51%) no tuir fali mak Dr. Francisco Guterres Lu Olo ho votus 144.129 (22,14%).
Total rejista hamutuk 859613 maibe ne’ebe partisipa iha eleisaun mak nain 650910.