Home Justisa Komunidade Bairo Seroja Rejeita Desizaun Governu Hasai Sira Husi Hela Fatin, Fo...

Komunidade Bairo Seroja Rejeita Desizaun Governu Hasai Sira Husi Hela Fatin, Fo Priviléjiu ba TVE Duke Povu

525
0
Komunidade Bairo Seroja Golgota halo konferensia imprensa. [Foto: Calisto dos Santos Oqui. [Foto: Oqui | 25.03.2022]

Reportajen Calisto dos Santos Oqui

Relasiona on desizaun husi governu hodi hasai komunidade iha bairo Seroja, husi hela fatin ka halo eviksaun, hodi asegura no fo priviléjiu ba Instituisaun privadu Sao Miguel Arcanjo no TVE.

Ho situasaun ne’e portavós husi komunidade ne’ebe hetan eviksaun, Elvis Martis hateten komunidade bairo Seroja lasatisfas no rejeita total, desijaun governu ne’ebé atu hasai komunidade bairu Seroja husi hela fatin ka (gusur), hodi assegura no fó previlejiu ba instituisaun privadu São Miguel Arcanjo no TVE duke nia povu rasik, konsidera hanesan desijaun injustu no laiha utilidade ba nia povu.

“Ami rejeita hodi defende ami nia direitu tuir Konstituisaun RDTL artiguº 54 (direitu ba propriedade privadu) no artigu 58°(hela fatin) no mós ami husu ba governu atu trata ami ho dignu, laiha diskriminasaun no hatuur povu iha justisa social, tuir KRDTL artigo 6 (objetivu estadu)”, dehan Elvis ba jornalista sira, iha Rai Kotuk 25/03.

Ba jornalista sira komunidade sira hato’o razaun hodi rejeita governu nia lalaok katak  tuir lei orgániku VIII Governu ba fins investimentu boot kona bá arendamentu ba rai no uma estadu (hanesan edifisiu ba eskola konsidera/kategoria investimentu boot), ne e kompeténsia Ministeriu da justisa maka tetu no desidi, la’ós Vise Ministru Obras públika, tanba kompeténsia Vice Ministru Obras públika nian atu haree de’it ba parte afetasaun.

Nia Eskola São miguel no TVE iha fins lukrativus, maibé durante halo okupasaun iha atuál eskola refere sem submete iha prosessu kontratu arendamentu ho Estadu (liu-liu ba diresaun jerál terras propriedades – Ministerio da Justisa).

“Karik eskola São miguel no TVE iha interesse atu okupa no utiliza rai seroja ba fin arendamentu ho estadu presija hetan autorizasaun ou aprovasaun husi ministro da justisa refere ba kompeténsia ne’ebé iha, ao mesmo tempu orienta terras e propriedades hodi lidera prosessu ne’e. La’ós gabinete vise ministro da justisa ou vise ministru obras públikas.”

Portavos hatutan eskola São Miguel no TVE nu’udar eskola ne’ebé hetan lukru husi estudante sira sem iha prosesu arendamentu ho estadu maibé edifisiu eskola São Miguel no TVE maka impede estadu atu hala’o alargamentu ba estrada nasionál ne’ebé liga munisipiu sira ho kapitál Dili liu-liu liga ba portu tibar, no piór liu ezije estadu atu kompensa sira nia edifísiu ho $1.200 millaun

 “Ami komunidade seroja prontu regula ami nia okupasaun direita ho guvernu através kontratu arendamentu, no la aseita entrega rai ba eskola São Miguel no TVE ne’ebé la konsidera nuudar instítuisaun estadu ida.”dehan Elvis

Sira husu ba Primeiru ministru Taur Matan Ruak atu altera desizaun ne’ebé mak foti ona, liu husi Konsellu Ministru kona ba muda eskola São miguel no TVE ba iha bairu Seroja.

Elvis hateten ho desizaun ne’ebé mak Terras Propriedades no Obras Publika, foti desizaun la koletivu tan laiha despaixu husi Ministerio Justisa, no ami ezije ekipa tekniku atu tun terrenu tenki lori ho despaixu legál husi sua Ex. Ministru da justisa.

“Ami la satisfas ho desizaun governu ne’ebé atu oferese komunidade seroja nia hela fatin ba instituisaun privadu. Haree ba estadu ida ne’ebé hatuur estadu de direitu demokratiku ne’ebé trata nia sidadaun ho iguál no dignu maibé infelizmente trata de’it ema ne’ebé iha poder (fahe klasse) fo previlegio ba ema empreza privadu”, dehan Elvis

Portavos ne’e husu tamba sá tenki bairu Seroja, estadu laiha ona hanoin estratéjiku atu kria edukasaun ida ne’ebé dignu, iha bairu ne’ebé livre husi destrundu, tanba harii eskola iha bairu ida ne’e besik liu ho aeroportu internasionál Nicolau Lobatu signikfika prejudíka atividade aprendizajem. Estadu ida ne’ebé hanaran estadu de direitu demokratiku ne ebé garante sustentabilidade, tanba sá tenki fó oportunidade atu kria estadu kapítalista, mesmu indireta maibé psikolojikamente hatudu duni.

Komunidade sira ezije ba governu atu koopera ho estadu hodi halo dezenvolvimentu (ami konkorda), maibé tanba sá? governu la ezije São miguel atu koopera ho estadu husik hela ninia edifisiu hodi halo konstrusaun alargamentu ba estrada. Sera ke ida ne’e mak trata povu ho dignu ka hanaran justisa sosiál tuir KRDTL?

“Jerálmente atu harii kompaña privadu ka fundasaun tuir orientasaun estadu tenke priense rekezitus tuir lei orgánika ba empreza privadu: geografikamente (planta, area/fatin) edifisiu maibe realidade hatudu katak emprejariu sao Miguel no TVE falladu, ho razaun ne’ ebé maka ami sita iha leten. Ami haree katak emprezariu São Miguel no TVE hetan lukru privadu, maibé uza fali makina estadu hodi hanehan komunidade bairu seroja nia direitu”, dehan Elvis

Relasiona ho assuntu hirak neebe mak iha leten, komunidade hakarak rekomenda ba governu liu husi konsellu ministru tenke tetu no analiza didiak antes atu foti desijaun fo propriedade estadu ba isntituisaun privadu.

Tuir Xefe Aldeia Golgota, Agustinho de Sousa Pereira  hateten katak ami labele diskrimina populasaun no governu, maibe governu tenke kria kondisaun ,tamba komunidade sira lasatisfas ho desizaun balu.

“Hau nudar xefe aldeia husu nafatin ba parte ministeriu kompetente atu buka tok solusaun ruma ba iha bairu saroja ninia problema liliu ba populasaun ba afetadu husi instituisaun privadu eskola são Miguel.” Dehan Xefe Aldeia ba jornalista sira

Tuir Xefe Aldeia hateten horseik seidauk hatene loloos katak komunidade uma kain hira mak hetan efetadu iha bairu Seroja ne’e, maibe iha populasaun hamutuk iha aldeia ida ne’e total 72 uma kain, maibe afetadu ne’e ita seidauk hatene loloos, tamba seidauk iha terminasaun husi governu.

Print Friendly, PDF & Email

LEAVE A REPLY

Please enter your comment!
Please enter your name here