Home Uncategorized Dadus Hotu Hosi Ministeriu Saude, Maibe Ministra Elia ho Dr Rui La...

Dadus Hotu Hosi Ministeriu Saude, Maibe Ministra Elia ho Dr Rui La Kaer Dadus Hanesan

1435
0
Vice Ministra Saude Elia Dos Reis Amaral Halo Konferensia Imprensa, iha Media Center, CIJK, CCD, (Foto: Frans JDA)

Reportazen Fransisco JDA

Ohin iha CCD, mosu deklarasaun publik rua mak ho dadus diferente. Deklarasaun publik mak hato’o liu hosi media dahuluk hosi Porta Vos Centru Integrasaun ba Jestaun Krizi (CIJK), Dr Rui Maria Araujo. Maibe bainhira deklarasaun Dr Rui nian hotu, Vice Ministra Dra Elia Dos Reis Amaral tama kedas halo deklarasaun publik ida tan mak ho dadus diferente. Ironiku liu mak dadus hirak ne’e mai hosi Ministeriu Saude hotu.

Porta Voz CIJK, Dr Rui Maria de Arauho hatete ba media katak dadus ne’ebe nia fo sai mai hosi Sistema de Vijilansi Epidemolojia Ministeriu Saude nian.

“Dadus ne’ebe rekolla hosi Sistema de vijilansi epidemolojia Ministeriu Saude fo sai katak Suspeitu hamutuk 35, signifika sira ne’e mai hosi fatin afetadu no hahu hatudu simtomas. Halo Analiza nia rezultadu, 1 kontinua positivu, kazu konfirmadu anunsia iha 21 de Marsu. Kazu negative 24, sira ne’ebe provavel iha nain 10,” Dr Rui Maria Araujo esplika ba media iha Centru Media CIJK, ohin 02/04.

Liu deit minute balun nia laran, Vice Ministra Saude, Dr Elia A.A.dos Reis Amaral, tama iha sala Centru Media ho derepente hodi halo konferensia imprensa no fo sai katak laboatoriu nasionál halo teste iha Timor – Leste depois haruka ba Austrália hodi hetan konfirmasaun resultadu teste nian.

“Hosi totál ema nain 23 ita haruka amostra laboratorio ba Austrália 22 resultadu negativu signifika la iha moras Covid-19 no ida mak positivu resultadu ne’e signifika katak TL iha ema ida positivu ho Covid ne’ebé iha fatin isolamentu ema ne’ebé mós ita hetan ona resultadu semana kotuk MS deklara iha 21 de marsu ate agora mós resultadu positivu, hetan tratamentu ne’ebé adekuadu no pasiente agora kondisaun estavel,” Tenik Ministra Saúde Elia A.A.dos Reis Amaral iha CCD Merkadu Lama, 02/04

Bainhira jornalista sira husu kona ba dadus diferente mak entre Vice Ministra nian ho Porta Voz Dr Rui Araujo nian, Vice Ministra la hatan no taka konferensia imprensa no ba dadaun.

Vice Ministra Dra Elia A.A.dos Reis Amaral nudar membru ida hosi Komisaun Interministerial, Xefe ba Komisaun ne’e mak Primeiru Ministru Taur Matan Ruak. CIJK mak ekipa tekniku hodi halao operasaun relasiona ho COVID-19 nian. Dr Rui Maria de Araújo, eis Primeiru-Ministru no eis Ministru Saúde, nu’udar Kordenadór Ligasaun Ofisiál ba Forsa Tarefa iha CIJK, iha tempu hanesan nudar mos Porta Voz.

Loron hirak liuba (31 Marsu), Primeiru-Ministru Taur Matan Ruak, asina Diploma Ministerial n.14/2020, kona-ba estabelesimentu Sala Situasaun hosi Sentru Integradu ba Jestaun Krize, tuir lei n.o 2/2010, loron 21 fulan Abril, Lei Seguransa Nasionál, hodi kria Centru Integradu ba Jestaun Krize (CIGC-sigla Portugés).  CIJK ka CIGC nu’udar órgaun espesializada asesória no konsulta ba koordenasaun téknika operasionál ba entidade sira ne’ebé kompoin iha Sistema Integradu Seguransa Nasionál.

Iha n.o 2, artigu 38.º hosi Lei n.o 2/2010, loron 21 fulan Abril, CIJK bele funsiona hanesan Sala Situasaun iha kazu exesaun konstitusionál ne’ebé previstu iha lejizlasaun Estadu de Sítio ka Estadu Emerjénsia.

Durante Estadu Emerjénsia, CIJK sei funsiona nu’udar Sala Situasaun ho kompeténsia sira hanesan; presta apoiu téknika ba Komisaun Interministerial ne’ebé estabelese ona, koordena no monitoriza ezekusaun forsa tarefa sira, akompaña ba evolusaun sitasaun, trata informasaun hotu-hotu ne’ebé fó hosi serbisu kompetente, elabora estudu no proposta ho determinasaun hosi Komisaun Interministerial,  presta akonsellamentu ba asuntu relasionadu  no ezekuta tarefa sira ne’ebé determina ona hosi Komisaun Interministerial.

Print Friendly, PDF & Email

LEAVE A REPLY

Please enter your comment!
Please enter your name here