Reportajen Santina Lucia da Costa
Professora Benigna de Fatima Martins Soares, ne’ebé hanorin iha Eskola baziku Uai-Laco, Postu-Administrativu Venilale, munisipiu Baucau rekomenda ba Kandidatu Prezidente Republiku ne’ebé mak eleitu ba Prezidente Republika koalia ho Ministeriu relevante tenki tau importansia ba Professores sira no hasa’e salariu.
Professora Benigna de Fatima Martins Soares, hateten, iha mundu tomak Profossores ne’e importante liu, tanba liuhusi Professores mak sira bele matenek hodi sai boot ukun nasaun, maibé ba Timor-Leste nia haree Professores ne’e ki’ik liu.
“Iha mundu nia matan ne’e professores importante liu maibé ba Timor-Leste nia haree professores ne’e ki’ikoan, maibé liuhusi professores sira ida aat hanesan ne’e ema sai boot, sai Prezidente Republika tur iha nasaun, maibé professores sira nia salariu ne’e nafatin de’it to’o mate mós hetan de’it $ 310, ami nia nesesidade professores ne’e iha.” Konfesa, Professora husi eskola Baziku Uai-Laco, Benigna de Fatima Martins Soares ba Neon Metin foin lalais ne’e.
Benigna de Fatima Martins Soares, dehan, liuhusi Professores mak sira ba Ministru Edukasaun, ba Prezidente Republika, maske hanorin SD maibé atu sai boot ne’e hahú husi SD mak sa’e ba to’o leten, maibé nunka tau importansia ba professores sira.
“Ami hetan retorativu maibé governu la hatene tau eskalau oinsa ami mós lahatene, dalaruma ami ba chek ami nia osan ami bilang tiha, derepenti de’it osan mosu mai, maibé ami lahatene osan ne’e aumenta husi ne’ebé.” dehan, Professora Benigna.
Nia Rekomenda ba kandidatu Prezidente Republika ne’ebé atu sa’e ne’e husu ba governu liuliu Ministeriu Edukasaun se bele tau importansia ba Professores sira no hasa’e salariu ba Professores sira.