Reportajen Umbelina dos Reis
Prezidente Tribunal Rekursu (TR), Deolindo dos Santos, tersa-feira (29/03) iha Tribunal Rekursu Caicoli, deklara kandidatu Prezidente Repúblika (PR) Dr. Jose Manuel Ramos Horta ho Dr. Fransisco Guterres Lu-Olo, sei hakat ba eleisaun Prezidensiál segunda volta ne’ebé sei realiza liu hosi eleisaun iha loron 19 fulan abril 2022, tanba kandidatu rua refere la prenxe kritéria 50% + votu 1 (ida).
Rezultadu final eleisaun Prezidensiál períodu 2022-2027 ne’ebé mak kompete entre kandidatu na’in 16, Tribunal Rekursu deside kandidatu na’in rua (2) ne’ebé hetan votu maioria hanesan kandidatu PR, ho númeru sorteiu 14, Dr. Ramos Horta ho votu 303.477 ekivalente ho (46,6%), no kandidatu ho númeru sorteiu 6, Dr. Lu-Olo ho votu 144.282 ekivalente ho (22,1%), mak hakat ba eleisaun segunda volta.
Entretantu kandidatu PR ne’ebé la prenxe kritéria hodi hakat ba eleisaun segunda volta mak, Isabel da costa Fereira ho votu 4.219 (0,6%), Hermes da Costa Correia Barros ho votu 8.030 (1,2%), Maria Angela Freitas da Silva ho votu 711 (0,1%), Rogeiro Tiago de Fatima Lobato 2.050 (0,3%), Anacleto Bento pereira 13.205 (2,0%), Maria Helena Lopes de Jesus ho votu 5.430, (0,8%), Tito da Costa Cristovão “Lere Anan Timur” ho votu 49.314 (7,6%), Armanda Berta dos Santos ho votu 56.690 (8,7%), Antero Benedito da Silva ho votu 1.562 (0,2%), Constâncio da Conceição Pinto “Terus” ho votu 2.520 (0, 4%), Virgilio da Silva Guterres “Lamukan” ho votu 1.720 (0,3%), Martino Germano da Silva Gusmão ho votu 8.598 (1,3%), Felisberto Araújo Duarte ho votu 2.709 (0,4%), Mariano Sabino “Assanami” ho votu 47.334 (7,3%).
Rezultadu eleisaun prezidensiál ne’ebé hala’o iha loron 19 fulan Marsu verifika katak, apuramentu CNE ho STAE halo durante hahú husi estasaun votasaun no sentru votasaun husi munisípiu to’o apuramentu nasional la’o ho dalan ne’ebé los. Total votu válidu iha teritóriu tomak ba kandidatura na’in 16 hamutuk votu 651,859.
Rezultadu final eleisaun prezidensiál tuir lei sei komunika ba CNE ho STAE, nomos sei publika iha Jornal da Repúblika. Iha okaziaun ne’e mos Prezidente TR, Deolindo proveita ida ne’e fo hatene ba reprezentante kandidatura na’in rua, i au mezmu tempu tenke dada númeru sorteiu, “tanba ida ne’e mak ami fo sai katak loron aban kuarta-feira taka anúnsia i loraik ita halo númeru sorteiu ba kandidatu Prezidente Repúblika na’in rua, kandidatu Dr. Jose Ramos Horta ho kandidatu Dr. Fransisco Guteres Lu-Olo hodi nune’e hetan atribuisaun iha boletin de votu,” informa Prezidente Deolindo.