Home Notisia Komunidade Lia-Bala Tinan 5 La Halo Natar, Florindo: Governu Presiza Hadia Irrigasaun

Komunidade Lia-Bala Tinan 5 La Halo Natar, Florindo: Governu Presiza Hadia Irrigasaun

490
0
Natar Lia-Bala Venilale. [foto: Santy | 29.03.2022]

Reportajen Santina Lucia da Costa

Xefe Aldeia Lia-Bala, Suku Hato-Haco, Florindo Vicente Guterres, preokupa tanba tinan lima (5) ona komunidade iha Aldeia Lia-Bala la halo natar tanba irrigasaun aat. Ho esperansa katak, kandidatu Prezidente Republika ne’ebé mak eleitu ba Prezidente Republika koalia ho governu hadia Irrigasaun.

“Durante ami komunidade nia preokupasaun mak hanesan, Natar ne’ebe irrigasaun aat to’o ohin loron, durante tinan lima ami la halo natar  tanba bee dalan aat total.” hateten, Xefe Aldeia Lia-Bala, Florindo Vicente Guterres, iha Suku Uato-Haco, Postu-Administrativu Venilale, Munisipiu Baucau, foin lalais ne’e.

Xefe Aldeia Lia-Bala, dehan, aldeia Lia-Bala nia natar ne’e 240 hektares,  bee dalan husi natar to’o iha Kano-Hasa 3 kilo depois liu husi mota.

Natar ho nia Hektares 240 kada tinan koileta bele hetan tonelada hira? Florindo Vicente Guterres, hatan, “Uluk padre Locateli lori nia tratór mai ne’e ita koalia kasar ba mai ne’e 20 resin tonelada, depois padre Locateli idade avansadu, NGO ka governu la apoiu nia, entaun nia dada-an husi ami nia area to’o agora ami labele halo buat ida. Tanba kuran ba hotu hanesan, Tratór laiha uza manual de’it, entaun irigasaun mós aat ami labele halo buat ida.”

Florindo Vicente Guterres, akresenta, Agora dadaun komunidade sira la halo natar, ida-idak moris ho haki’ak animal depois fa’an, no ba buka serbisu hanesan buru kasar, hodi moris.

“Durante ne’e ami halo ona karta ba Ministeriu Agrikultura, sira resposta tiha no mós osan nia montante $ 14 Milloens iha, tau karimbu, ami simu de’it surat tahan ne’e,  tekniku sira promete dehan semana rua tun mai to’o agora ami hein nein ida atu mosu. Diretor jeral Agrikultura nian mai haree ho matan iha loron 12 Jullu 2021, maibé  nunka realiza. Ho ida ne’e mak agora dadaun komunidade sira halerik ba hahan.” hateten, Florindo Vicente Guterres.

Florindo, lamenta, Ohin loron ita tuir ona eleisaun Prezidensial, na’in ulun sira tun mai promete buat barbarak, maibé bosok de’it povu nunka realiza.

Autoridade lokál ne’e, subliña, povu ezizi mak kuandu nasaun ne’e atu forte karik, hadia komunidade Lia-Bala nia irigasaun hodi nune’e komunidade sira bele halo fali natar, ekonomia forte nasaun forte, ekonomia fraku nasaun mout.

Nia  Rekomenda  ba  Kandidatu Prezidente Republika sé mak eleitu koalia ho Ministeriu Agrikultura apoiu netik material no osan ruma, hodi nune’e hadia sira nia moris ne’e liuhusi  dada irrigasaun, kuandu hadia tiha irrigasaun ne’e povu la husu tan ona buat ida ba Ministeriu agrikultura.

Nia dehan, preokupasaun mós ba estrada, lori sa’e produtu lokal ba merkadu mós araska, bailoron sei di’ak uituan, komunidade rasik ho fizikamente la’o de’it.

Total komunidade ne’ebé  iha aldeia Lia-Bala Xefe familia hamutuk 164 KK, membru familia hamutuk  779.

Print Friendly, PDF & Email

LEAVE A REPLY

Please enter your comment!
Please enter your name here