Reportajen Adroaldo “Saretukau”
Iha kampaña komísiu segunda volta dahuluk kandidatu Prezidente Repúblika (PR) períodu 2022-2027, Dr. Ramos Horta, ho númeru sorteiu 1, iha Oekusi-Ambenu, Ramos Horta hato’o sei harii relasaun di’ak entre povu fronteira terrestre Timor nian ho nasaun Indonézia, liu-liu provínsia Nusa Tenggara Timur (NTT-Kupang), no governu Sentrál iha Jakarta, hodi dada investor investe iha Timor-Leste, hodi dinamiza ekonomia fronteira no ekonomia nasionál.
Horta hatete, ba povu sira ne’ebé hela iha fronteira, hahú iha Suai to’o Mota-ain ne’ebá, iha Oekusi katak servisu todan boot ke Xanana Gusmão halo, rezolve fronteira marítima no terrestre ho Indonézia, nune’e presiza iha relasaun di’ak entre povu sira iha área fronteira.
“Ita tenki buka Oe-cusse, governu nasional, autoridade Oe-cusse, tenki buka hametin liu tan relasaun ho provínsia NTT (Nusa Tenggara Timur/Kupang) i governu Sentral iha Jakarta. Ita nia ekonomia Oekusi, ekonomia Timor-Leste, prioridade mak ida ne’e, oinsá dada investimentu, kompañia bo-boot hosi Indonézia mai investe iha ne’e, ita nia relasaun ho Indonézia aumenta liu tan,” hatete Ramos Horta ba Povu Oekusi, Sábadu, 02/04.
Horta dehan presiza Prezidente ida ne’ebé iha esperiénsia di’ak no koñese nasaun viziñu no nasaun seluk ho di’ak, atu nune’e fasil dada investor hodi halo investimentu sira no dezenvolve ita nia ekonomia rai laran.
“Governu apoiu maka’as liu tan ekonomia Oekusi, ekonomia fronteira, apoiu liu tan seitor privadu. Ajuda ita nia seitor privadu ne’ebé hahú ona ho sira nian rasik, transporte marítima, nune’e ita bele hanesan ativu liu, boot liu, haksoit liu ita nia ekonomia para organiza hanesan Ferry Kupang to’o Oekusi, hosi Oekusi ba Díli to’o Baukau, hosi Díli mai Oekusi ba Kupang,” Horta hato’o ba eleitoradu sira iha Oekusi, fin de semana ne’e.