Reportajen Silvino Freitas
Estudante Universitariu no Ensinu Sekundariu ne’ebé halao nia estudu iha Dili, preokupa ho desizaun Komisaun Nasionál Eleisaun (CNE) no Sekretariadu Tékniku Administrasaun Eleitorál (STAE), ne’ebé la loke hikas rejistrasaun ba estabelesimentu votasaun paralelu iha kapital Dili iha eleisaun segunda-volta, tanba sira sei la tuir votasaun iha munisípiu idak-idak ho kestaun tempu no distánsia ne’ebé dook.
Tuir Portavós Estudante, Rosario Doloroso Ximenes hateten hafoin eleisaun iha primeiro-volta ne’ebé liu dadaun sidadaun barak maka lakon sira nia votus ba kandidatu nain 16 maka kandidatu an ba Prezidente Repúblika períodu 2022-2027, nune molok atu hakat ba segunda-volta STAE no CNE tenke halo preparasaun ne’ebé diak liu atu halo hikas rejistrasaun votasaun sentru paralelo, hodi fasilita hikas estudante sira ne’ebé halao estudu iha Dili, tanba estudante barak mak lakon sira nia votus tanba STAE ho CNE la halo sensibilizasaun detallu.
“Eleisaun prezidensiál segunda-volta ne’ebe kandidatu nain rua sei ba compete iha segunda-volta hanesan Dr. Jose Manuel Ramos horta no Dr. Fransisco Guterres Lu-Olo, ami husi estudante sekundariu no universitariu husi munisipiu 12 inklui RAEOA, ne’ebe halao ami nia estudu iha kapital Dili, hakarak hato’o ami nia preokupasaun sira iha eleisaun primeiro-volta STAE iha alternativu hodi hamosu centru paralelo atu nune’e bele solusiona ami estudante nia preokupasaun, maibe iha fali eleisaun ba II volta STAE deklara katak sei laiha tan rejistrasaun ba centru paralelo iha Dili” dehan Portavoz Rosario, liu hosi Komunikadu Imprensa iha Jardín 5 de Maio,(02/03).
Nia hatutan STAE no CNE presiza hadi’a jestaun ho diak hodi kontinua loke sentru votasaun paralelo hodi fasilita estudantes universitariu sira atu bele vota iha Dili no labele hamosu konfuzaun no diskriminasaun ba sentru votasaun iha diaspora/estranjeiru di’ak liu duke Sentru votasaun parallelo iha Dili, no sira mos konsidera diskriminasaun bo’ot ba estudante ho komunidade enjeral ne’ebé husi munisipiu mai buka moris iha Dili.
“Ami mos lakoi lakon ami nia votu, maibe tamba kestaun estudu no distansia prezudika ami labele ezerse ami nia votus iha ami nia munisipio no ami mos pronto mobiliza dadus sira hodi submete ba STAE atu bele hakaman servisu husi STAE, karik STAE konsidera sevisu ne’e todan” nia halerik.
Entretantu estudante Elias da Costa mos fundamenta iha primeiro-volta sira loke oportunidade rejistrasaun ba estudante atu sira bele rejistu hodi vota iha sentru votasaun paralelu maibe laiha preparasaun ne’ebé dignu, nune ikus mai estudante lubuk ida tenki lakon votus iha festa demokrasia ida ne’e.
“Iha primeiro-volta sira fo ona oportunidade atu rejista, nune ami estudante husi fakuldade siensia sosial UNTL konsege rejista estudante lubuk ida, hodi aprezenta ba STAE nune bele tuir votasaun iha sentru votasaun paralelo ne’ebé estabelese iha Dili, maibe ikus mai sira la simu ami nia pedidu rejistrasaun ne’e” Elias lamenta.
Nia hatutan karik to’o informasaun ne’e publika mak la iha ona resposta ruma hosi parte relevante, atu atende sira nia preokupasaun, maka sira sei foti medida hodi la tuir eleisaun tanba kestaun tempu no distansia atu ba munisipiu dook.
