Reportazen Santina L. da Costa
Relasiona ho lamentasaun publik nian kona ba perguntas la ho fontes klaru mak Entrevistador GMN TV Expedito Dias Ximenes hato’o ba Presidente Partidu CNRT Xanana Gusmao iha 8 Fevereiru 2020, Konsellu Imprensa buka tuir faktu sira no konklui katak la iha verasidade ba referensia ne’ebe intervistador halo.
“Bazeia rezultadu verifikasaun ne’e Konsellu Imprensa konklui katak entrevistadór Expedito Diaz Ximenes la lao tuir prinsipiu jornalizmu tanba hamosu narasaun ho pergunta ne’ebé la bazea ba faktu”, Prezidente Konsellu Imprensa, Virgilio da Silva Guterres hato’o ba jornalista sira liu husi Konferensia Imprensa, iha loron Tersa-feira, 18/2/2020, iha Konsellu Imprensa, Kintal Bo’ot, Dili.
Virgilio da Silva Guterres mos hato’o katak verasidade fonte ne’ebe intervistador Expedito temi iha ninia intervista iha programa primadona GMN Grande Intervista Spesial, ho perguntas katak tuir “media balun hatete Premeiru Ministru Taur Matan Ruak mak lakoi ema nain 9 hetan pose”, ne’e kestionavel.
“Narasaun ne’e la bazea ba faktu tanba entrevistadór Expedito foti informasaun husi mídia sosial nu’udar referensia ba nia iha programa ne’e ho fonte anonimu ne’ebé nia verasidade kestionavel. Konsellu Imprensa hare katak entrevistadór programa grande intrevista la uza produtu jornalistiku ida ne’ebé kredivel sai nu’udar fake news no hoax sai referénsia ba programa ne’e.” Presidente Konsellu Imprensa hatutan.
Presidente Konsellu Imprensa ne’e mos hatete katak, “Narrasaun ho pergunta ne’ebé entrevistadór hato’o ne’e halo ho intensaun atu forma opiniaun publiku foun iha situasaun politika dadauk nee. Ho ida ne’e Konsellu Imprensa konsidera redasaun GMN Viola kodigo etika pontu 1 no pontu 2 tanba la tranzmite informasaun loloos bazeia ba referensia ida ne’ebé loos.”
Prezidente Konsellu Imprensa informa mos katak, Redasaun GMN TV iha obrigasaun etika atu lao tuir prinsipiu jornalismu paz nian (Peace Journalism) atu evita konflitu entre lider nasional sira ne’ebé bele dirije ba instabilidade politika no seguransa iha país ne’e.
Bázea ba rezultado monotorizasaun, peskiza no analiza, Konsellu Imprensa nu’udar orgaun reguladora ba meius komunikasaun sosial iha Timor-Leste, tuir artigu 44 alinea I, Lei komunikasaun sosial Nu 05/2014, ne’ebé fó kompetensia ba KI hodi fó ninia supervizaun orgaun komunikasaun sosial no serbisu jornalistiku iha Timor-Leste.
Bazea ba kompetensia ne’ebé lei komunikasaun emenda maka KI hakarak hato’o buat nebé mak temi tuir mai; Husu ba redasaun GMN atu uza referensia sira ne’ebé kredivel liuliu uza fonte notisia sira ne’ebe ninia ezisténsia publiku bele asesu no fiar, nune’e informasaun sira ne’ebé tranzmite labele Mislead. Husu ba redasaun GMN nian atu tane aas prinsipiu jornalizmu paz (Peace Journalism) iha ninia publikasaun atu hodi promove paz no estabilidade iha railaran, la’os atu soran fali lider nasionál sira; Husu ba redasaun GMN atu hato’o faktu ho loloos iha ninia publikasaun, purezemplu tenke espesifikamente temi mídia ne’ebé mak publika notisia no ho data edisaun nian nunee labele prejudika kanál mídia sira seluk; Husu ba redasaun GMN atu kaer metin nafatin kódiku etika jornalístika no prinsipiú universal jornalistika, tanba ida ne’e nu’udar dalan diak liu, atu ajuda hases GMN husi risku legál iha futuru.
