Reportajen Santina Lucia da Costa
Eskola Ensino Baziku Sentral Katólika, Nossa Senhora Aitara Soibada (EBCC) La iha sala Biblioteka no livru sira tau naklekar de’it iha eskritóriu professor sira nian, livru barak mak aat ka dodok hotu ona.
Ba Neon Metin, Professor Eskola EBCC Soibada, Mareliano Luis Xavier Soares, hateten, Kona-ba Biblioteka, fatin sira ne’ebé tau livru sira mós armari dodok hotu ona, no livrus mós aat hotu ona, rai naklekar de’it la favoravél tebes atu tau fasilidade sira ne’e.
“Uluk ami nia biblioteka ne’e iha sala ida, maibé sala ne’e aat tiha, entaun fatin biblioteka la difinitivu tanba fatin la favorese atu tau livru sira ne’e ho di’ak. Livru sira ne’e tau iha professor nia fatin rohan no professor sira mós uza rohan.” dehan, Professor Mareliano Luis Xavier Soares iha Eskola Ensino Baziku Sentral Katolika Nossa Senhora Aitara Soibada, Munisipiu Manatutu, Kinta-Feira, 7/4.
Iha Fatin hanesan, Estudante, Filomena da Costa Dias, akresenta, Hanesan estudante ida atu hato’o de’it katak, durante ne’e kondisaun eskola mak hanesan ne’e hela de’it, biblioteka laiha, kantor aat, kadera, meza aat hotu ona.
“Ami nia livru sira dodok hotu ona, fatin laiha atu tau, ami presija livru atu lee, maibé livru sira ne’e dodok hotu, hau sente triste, maibé hakarak ka lakohi tenki simu realidade ne’e.” Hateten, Estudante Filomena da Costa Dias.
Nia hatutan, Tempu aprende ne’e professor sira ladun tama, tanba livru, Jis laiha, fasilidade sira hanesan, komputador, laptop laiha bainhira atu pratika.
Estudante ne’e, husu ba Kandidatu Prezidente Republika na’in rua, karik ida mak eleitu ba Prezidente Republika Influensia Governu, tau matan ba Eskola Ensino Bazika Sentral Katolika, Nossa Senhora Aitara Soibada, tenki hadomi jerasaun foun sira nia futuru liuliu ba edukasaun.