Reportajen Santina Lucia da Costa
Lian Eleitór sira ba Prezidente Republika foun, tenke hadia povu nia moris, asesu ba Estrada Bee-moos, Agrikultura, Saude, Edukasaun, loke kampu serbisu ba joven sira, tau matan ba Ema ho Difisiensia (EhD), ratifika konvensaun direitu ba EhD, no povu presiza hakmatek lakohi krize mosu tan.
Ba Neon Metin, Eleitór Ercia Agustinha Maria de Canossa Soares, idade 25 hela iha Lurumata, ho nia Esperansa katak, hadia povu nia moris, liuliu ba asesu Estrada, bee-moos, Agrikultura, Saude, Edukasaun no loke kampu serbisu ba joven sira ne’ebé mak agora dezempregu hela.
“Hau nia aspirasaun ba Prezidente Republika maka, hametin Paz, Estabilidade, kria kampu serbisu bba joven sira ne’ebé mak agora dezempregu hela, hadi’a di’ak liu tan infranstrutura, no liuliu ba situasaun ekonomia ne’ebé oras ne’e dadaun la’o ladun di’ak.” Esperansa, Joven Ercia Agustinha M. de Canossa Soares iha Sentru Votasaun Eskola São Pedro, Comoro, Dili, 19/4.
Joven ne’e Rekomenda ba Prezidente Republika, tenki implementa promesa sira ne’ebé mak durante koalia iha palku politika kampaña, nu’udar joven lakohi sai vitima ba lider sira nia politika, tenki hatudu ezemplu di’ak hodi nune’e joven sira mós bele banati tuir.
Entretantu, Eleitór Difisiente Ain, Abilio José António Camões, idade 27, serbisu iha RHTO, ho Esperansa katak, , ho Prezidente Republika foun ne’ebé mai hanoin ne’ebé inkluzivu liu para oinsa atende ema hotu-hotu liuliu ba Ema ho Difisiensia (EhD), bazeia ba programa no atividade ne’ebé mak bele benefisia no fó sustentavél ba ema hotu-hotu nia moris.
“Hanesan ema ho Difisiensia ami ezizi ba Prezidente Republika, tenki ratifika konvensaun ne’ebé mak Konvensaun direitu ba ema ho difisiensia iha Timor-Leste, atu bele haforsa liu tan direitu no papel ema ho difisiensia iha sosiedade.” Esperansa, Difisiensia Ain, Abilio José A. Camões liuhusi via telfone.
Abilio José A. Camões, hateten, sinais ki’ik sira ne’ebé mak taka iha Estrada ibun, loja, saude no edukasaun, ho buat hirak ne’e hotu seidauk inkluzivu liu. Entaun liuhusi buat sira ne’e mak seidauk hadi’a ba oin hadi’a di’ak liu tan.
Iha Sorin seluk, Eleitór Marciana Soares, idade 30, agora dadaun serbisu iha loja Bonda, Hela iha Fomentu II, ho Esperansa katak, Prezidente Republika foun tenki haree povu sira nia moris.
“Hau nia hakarak situasaun ne’e la’o normal para ami bele serbisu ho di’ak labele mosu tan krize, ami povu hakarak hakmatek.” Dehan, Marciana Soares.
Marciana, Rekomenda, ba Prezidente Republika foun, Joven barak laiha serbisu ne’ebé ba Prezidente Republika foun koalia ho Governu kria kampu serbisu ba Joven sira hodi nune’e joven sira labele sai hanesan bainaka ba nia rai rasik.
No Eleitór, Hercules Correia Barros, idade 57, Serbisu iha Diresaun Nasional Seguransa Patrimoniu Publiku (DNSPP), ho esperansa katak, Sé mak sai Prezidente Republika importante povu tenki hakmatek, buat ne’ebé seidauk hadi’a tenki hadi’a, hadia Estrada hodi nune’e povu sira lori sira nia produtu lokál ba fa’an iha merkadu.
“Nu’udar seguransa iha DNSPP, durante Covid-19 ami nia osan simu de’it fulan tolu, fulan hirak ona ami la simu to’o agora, sé bele Prezidente foun koalia ho governu tau matan ba ami, tanba farda sira ami simu ladun kualidade.Fulan ida simu $ 270.” Hateten, Hercules Correia Barros.