Reportajen Santina Lucia da Costa
Eleisaun Prezidensial ba periodu 2022-2027, marka tan istória dala ida, tanba akontese tan ronde daruak, hodi fo fila fali povu sira ezerse sira nia direitu, hodi hili se los mak sira hili atu sai Xefe Estadu.
Iha loron 19 Abril, ronde daruak ne’ebe kompete entre kandidatu Prezidente Republik, Dr. Francisco Guterres Lu Olo ho Dr. Jose Ramos Horta. Situasaun eleisaun ne’ebe lao dadauk, bainhira Neon Metin halo entrevista ho Ema ho Defisiénsia (EhD), sira hato’o expresaun katak, fatin ba votasaun la asesivel ba sira.
Nune’e Ema ho Defisiensia, Abilio Camoes husi Ra’es Hadomi Timor, Abilio J. A. Camões rekomenda ba governu ba oin, hadi’a sentru votasaun sira hodi nune’e ema hotu bele asesu hanesan.
“Pesoalmente ohin loron importantes tebes ba eleisaun segundu volta, votus importante tanba hanesan ema sidadaun Timor-Leste, hanesan mós Ema ho Difisiensia (EhD), iha direitu tomak fó netik loron ida tinan lima dala ida hodi ezerse nia direitu”, dehan Abilio ba Neon Metin, 19/04.
Nia dehan iha Fomentu II ne’e la asesivel ba nia, hanesan Ema ho Difisiensia (EhD), no ba Ema ho Difisiensia ain tur iha kadeira roda, Ema ho Difisiensia matan, sentru votasaun ne’e la asesivél. Hau ohin ba iha ne’eba sira husi parte Ofisiais CNE nian apoiu hau kaer hau to’o rejistu naran.
Abilio rekomenda ba oin eleisaun tenke ho asesivel ne’ebé mak di’ak, hodi fó espasu ba ema hotu bele ezerse ninia direitu hanesan ho ema sira seluk.
Entretantu Difisiente Maria Rejina Tavares de Jesus Barros, idade 27, hela iha Farol, hateten, kontente mai fó votus hanesan sidadaun mai ezerse nia direitu.
“Hau nia aspirasaun ba Prezidente Republika foun, hau hanesan difisiente, nain ulun ida ne’ebé mak manan, importante hadia povu nia moris, ukun di’ak, hau presija ajuda husi nai-ulun sira.” Esperansa husi Maria
Iha Fatin hanesan Inan husi Difisiente Maria R. T. de Jesus Barros, Angelina Maria Tavares de Jesus, idade 59, haktuir, Nia moris mai hanesan ne’e kedas, durante ne’e nia simu osan husi Governu, no NGO balun fo fasilidade hanesan kadeira roda.
“Ohin hau mak lori nia ba vota, hau husu nia hakarak tú iha kandidatu ne’ebé, nia dehan nia naran mak hau tú.No fatin sentru votasaun ne’e ladun di’ak, ohin hau dudu nia ho kadeira roda, atu tam aba, hau ho ofisias CNE sira hit saé de’it.” Dehan, Angelina Maria Tavares de Jesus.
Inan husi Difisiente Maria, hateten, Durante ne’e governu seidauk fó fasilidade hanesan kadeira roda, agora Prezidente Republika foun, tenki koalia ho Governu hodi tau matan ba Ema ho Difisiensia sira.
Tuir Observasaun Neon Metin, Ema ho difisiesia sira bainhira mai ezerse sira nia direitu, fatin ba sira la asesivél, ema ho difisiensia sira balun mai, hiit sa’e de’it kadeira roda mak dudu tama ba laran hodi vota.
Entretantu, iha sentru votasaun refere hetan observasaun masimu husi Sentru Nasional Eleisaun (CNE), observadór Internasional, no Seguransa husi Polisia Nasional Timor-Leste (PNTL).
