Reportajen Santina Lucia da Costa
Primeiru Ministru ,Taur Matan Ruak informa governu hala’o hela preparasaun tomada de posse ba Prezidente Republika eleitu ba periodu 2022-2027, ne’ebé sei realiza iha ambitu komemorasaun loron restaurasaun independensia 20 Maiu 2022 iha Tasi-Tolu.
Primeiru Ministru Taur Matan Ruak hateten asuntu ne’e, hafoin halo enkontru semanal ho Prezidente Republika Dr. Francisco Guterres Lú Olo iha Palasiu Prezidensial Nicolau Lobato, Bairu-Pite, Dili.
“Preparativus ba serimonia tomada posse ba Prezidente Republika eleitu. Preparasaun la’o hela, Ministeriu Administrasaun Estatal (MAE) mak halo, iha tasi tolu, espera katak, preparasaun la’o di’ak to’o loron tomada posse.” informa, Xefe Governu Taur Matan Ruak, loron, Kinta-Feira, 21/4.
Xefe Governu ne’e dehan kampaña eleisaun Prezidensiál 2022 remata ona, ho nune’e agora sei fó prioridade hodi foku ba kestaun serbisu nasaun nian.
“Ba hau nia hanoin kampaña hotu tiha ona agora ne’e ita koalia hanesan estadu, tanba ne’e preparativus laiha alterasõens, baibain kada tinan lima kuandu Prezidente eleitu foun ona, ita sempre halo preparasaun ba Prezidente eleitu sira, governu sempre prepara tomada de posse sei hala’o iha Tasi-tolu.” Hateten, Primeiru Ministru Taur.
Kona-ba bainaka sira ne’ebé partisipa iha tomade posse ba Prezidente Republika foun, Taur dehan, “kona-ba tomada posse ne’e sese mak atu partisipa dadaun ne’e seidauk hatene, seidauk haree lista ida ne’ebé mak konvidadu, ita hein, haree sé mak bele partisipa, agora ita infrenta hela pandemia global covid-19 país balun loke ona no balun mós seidauk.”
Iha enkontru semanal ne’e, Primeiru Ministru Taur Matan Ruak ho Prezidente Republika Dr. Francisco Guterres Lú Olo koalia mós kona-ba asuntu seguransa iha rai laran.