Reportajen Joselina dos Santos
Asosiasaun Jornalista Timor-Leste (AJTL) komemora loron Liberdade Imprensa ho tema “Jornalizmu Iha Ameasa Dijitalizasaun” hodi fó solidariedade ba jornalista sira iha mundu tomak no mos fó omenajen ba Jornalista senior Max Stahl, ne’ebe mak durante ne’e fó kontribuisaun makaas ba luta ukun rasik-an no akontese Violasaun Direitus Humanus iha Timor-Leste.
Iha Komemorasaun ne’e, Prezidente AJTL, Zevonia Vieira hateten Ohin komemora loron ne’ebe importante tebes, 3 Maiu loron mundial ba Liberdade Imprensa, ba jornalista sira iha mundu tomak, atu luta ba liberdade imprensa ne’ebe mak durante ne’e sai hanesan xave importante ba ema hotu, atu sai ponte entre estadu ho povu, hodi publika sai interese públiku nian.
“Ita hatene katak iha mundu tomak jornalista barak hetan oho, no lakon ne’ebe to’o agora la hetan inklui jornalista balun ne’ebe mak fo kontribuisaun ba Timor-Leste nia luta ukun rasik-an, tanba ne’e fó ita nia solidariedade ba sira,” Dehan Prezidente AJTL Zevonia Vieira iha Semitériu Santa Cruz Balide, 03/05.
Feto ativista ne’e hatutan, saudozu Max Stahl nia kontribuisaun hodi fanun mundu nia neon, atu hare violasaun direitu umanus ne’ebe akontese iha Timor, nune’e ita iha devér hodi fo honra ba sira, no banati tuir saida mak sira halo ona, ida ne’e parte husi liberdade imprensa
Zevonia dehan papél jornalista nian importante tebes, halo advokasia, sai lian ba kbiit laek sira, luta ba lia los, kontra informasaun falsu sira no kontinua promove liberdade imprensa no espresaun iha Timor-Leste.
Iha ámbitu komemorasaun ne’e, AJTL halo reflesaun badak, kari ai-funan no sunu lilin iha monumentu Saudozu Max Stahl iha Santa Cruz.