Reportajen Santina Lucia da Costa
Prezidente Konsellu Imprensa (KI), Virgilio da Silva Guterres “Lamukan” hateten, Atu kombate ameasa husi Dijital, importante ita halo agora maka literasia dijital, sosiedade tenki hatene uza ninia ekipamentu komunikasaun hanesan, Android, Tablet, ka komputadór.
Prezidente KI Virgilio da Silva Guterres “Lamukan” koalia asuntu ne’e liuhusi Seminariu ho tema “Jornalizmu iha Ameasa Dijitalizasaun” iha ambitu komemorasaun loron liberdade imprensa ne’ebé hala’o iha Salaun Delta Nova.
“Ita atu kombate ameasa husi dijitalizasaun buat ne’ebe importante ita halo agora maka literasia dijital, katak, ita idak-idak, ita nia sosiedade tenki hatene uza ninia ekipamentu komunikasaun, android, tablet, ka komputador, hatene uza, maneja no kontrola, tanba sein ida ne’e ita nia ambisaun atu luta ba ameasa dijitalizasaun ne’e tinan-tinan koalia hela de’it ita labele konkretiza.” dehan, Prezidente KI iha loron, Tersa 03/5.
Lamukan, realsa tan katak, Ita luta ka komprimisu sempre pasu ida iha kotuk, bainhira ita hanoin ba literasi mediatika, oinsa atu asesu ba media.
Lamukan hatutan, ida ne’e mós sai referensia ba Nasoens Unidas liuhusi UNESCO, foti issu dijitalizasaun ne’e sai hanesan issu importante ida atu organizasaun profisionais, orgaun komunikasaun sosial sira, advokadores ba liberdade imprensa atu haree hamutuk oinsa maneira, formatu ida atu fó protesaun ba ita nia jornalista sira.
Nia informa, Atu lori mai iha ita nia situasaun Timor, Ho buat lubuk ida dezde inisiu ita seidauk mak hanesan, nivel analfabetizmu, mais de 40 -50% ita nia sosiedade no populasaun barak seidauk bele lee no hakerek, no seluk, sira ne’ebe hatene lee no hakerek ona ne’e mos persentajen barak liu kuaze 70% mak la lee, ida ne’e mos aumenta ona tereinu ida ne’ebé fertil ba dezinformasaun, buat ne’ebé ita nota iha periodu kampaña.
Nia Akresenta, Faktor seluk maka, jornalista sira real, dalaruma ezizensia sira nia serbisu, ka komprimisu tenki halo makaas liu no laiha balansu ho remunerasaun ne’ebé mak sira simu, buat ne’ebé sai preokupasaun mós KI nian, tanba lamentasaun barak husi jornalista sira, serbisu iha tempu feriadu, serbisu ne’ebé fora husi serbisu nian, maibé laiha legaliza ruma ba sira.
“Ho komemorasaun tinan ida ne’e hau hakarak fó lori Konsellu Imprensa apresiasaun maka’as ba orgaun komunikasaun sosial sira hamutuk ho jornalista sira durante periodu tinan rua liu ba difisil teb-tebes pandemia covid-19.” hateten, Prezidente KI.
Entretantu, Prezidente KI Apresia mos empeñu jornalista sira nian, orgaun komunikasaun sosial iha periodu kampaña eleitoral nian, mezmu ho kondisõens oioin no limitasaun oioin, prezensa media kontinua iha ne’eba fó informasaun.
“Hein katak iha eleisaun Parlamentar tuir mai, media sira RTTL, TATOLI, GMN TV, STL TV, se mes-mesak labele hamutuk, atu nune’e ita mós sai referensia ba ita nia publiku atu akompaña kona-ba eleisaun ninian ka eventu nasional sira seluk.” dehan Lamukan.
