Reportajen Francisco Colo
Estrutura Timor-Leste Press Union (TLPU) hasoru malu ho Prezidente Republika, Dr. Jose Ramos Horta, hodi aprezenta preokupasaun konaba edifísiu, formasaun serbisu protokolu no formasaun lingua English no Portugues ba jornalista sira, hodi hasa’e koñesimentu jornalista sira nian
Hafoin enkontru ba jornalista sira Prezidente TLPU, Candido Alves hateten iha enkontru ho Prezidente Repúblika TLPU hato’o susar ne’ebe hasoru liu-liu edifísiu ba TLPU hodi bele hala’o knaar.
“Ami ba hasoru malu ho Prezidente Republika ko’alia kona-ba susar no halerik ne’ebé durante ne’e ita hasoru, liuliu kona-ba TLPU ne’ebé laiha fatin, se laiha fatin katak laiha identidade, tanba ne’e mak ita hato’o ba nai Prezidente kona-ba buat ne’ebé mak ita hasoru. Prezidente Horta resposta nia sei hatutan ba governu, atu bele buka fatin ida ne’ebé dignu,” dehan Prezidente iha palasiu prezidensiál Aitarak Klaran Dili, 31/05/2022.
Asuntu seluk ne’ebe Prezidente TLPU hato’o mak konaba kestaun atu buka dalan, oinsá fasilita formasaun protokolu no prepara fatin dignu ba jornalista sira ne’ebe destaka iha palasiu Prezidente.
“Ita mos husu atu oinsa jornalista sira bele hetan mos formasaun liuliu protokolu, no jornalista sira loro-loron destaka iha palasiu Presidente atu bele iha fatin ida ba sira, nune’e sira bele hala’o serbisu ho diak, tanba loron tomak sira hala’o serbisu iha ne’e, entaun Prezidente resposta ho pozitivu katak ha’u sei tau atensaun tau komputador, Wi-Fi, no mós prepara ai-han ruma meudia nian ba jornalista sira, ne’ebé loro-loron hala’o serbisu iha fatin ida ne’e.” salienta Prezidente TLPU Candido Alves.
Candido konklui katak formasaun lingua konaba English no Portugues sei menus, nune’e TLPU husu ba Prezidente Republika atu bele buka dalan, hodi fo oportunidade ba jornalista sira bele hasae kapasidade iha lingua nian.