Reportajen David da Costa Gusmao
Ministra Negósiu Estranjeiru no Kooperasaun (MNEK), Adalgisa Magno Informa governu esforsu hela buka dalan, atu haruka fila bolseiru Timoroan sira atu fila ba Xina hodi kontinua sira nian estudu.
Preokupasaun estudante sira ne’ebè hato’o bebeik ona ba governu Xina, maibé Xina iha hela situasaun Pandemia Covid-19, no Xina rasik sei aplika hela Lockdown, tanba ne’e mak estudante hirak ne’e seidauk bele fila.
“Tinan kotuk kedas husi MNEK no mos Ministériu relevante, husu beibeik Xina bainhira maka estudantes sira bele fila fali ba Eskola, Ita hotu hatene situasaun Lockdown Ka Konfinamentu , Xina rasik to’o agora sira seidauk nakloke atu haruka ema liur ba, entaun ami husu para sira bele disponibiza ona meius balun para hodi timor-oan sira fila fali ba eskola iha ne’ebá,“Dehan Ministra MNEK iha Palasiu Governu Sesta 3/6.
Adalgisa esplika wainhira iha ona Desizaun loloos , Governu rekomenda ba bolseiru sira Fila ba Xina tenke kumpre regra Covid19 nian ne’ebe lao hela iha ne’eba.
“Loby ne’e ami halo ne’e dezde tinan kotuk kedas, no sira aseita tanba antes sira mai, prosesu ami halo hela, para ema nain 17 bele ba uluk, tanba sira mós husik ona sira nia eskola kleur loos. sira aseita no sei kumpre hotu regras ne’ebe iha Xina relasiona ho Covid-19,” Governante afirma.
Antes ne’e mós estudante bolseiru hirak ne’e hato’o mós sira difikuldade ba parte relevante hanesan Ministru Ensinu superior Siénsia no kultura (MESSK) no Prezidente Repúblika, Dr. José Ramos Horta atu tulun buka dalan ba sira, hodi fila ba Xina kontinua sira nia eskola iha ne’ebá.
Enkuantu estudante hirak ne’e hamutuk n’ain 200 resin fila mai Timor-Leste iha tinan kotuk wainhira Virus Covid-19 invade iha Xina, no studante bolseiru sira ne’ebe estuda iha Xina mai husi kursu medisina, kursu enjeñaria, kursu ekonomia, kursu direitu no seluk tan.