Reportajen Adroaldo “Saretukau”
Loron mundiál Meiu Ambiente ne’ebé monu iha Domingu 5 Juñu, grupu estudante Ajuda Atu Estuda (AAE) hala’o atividade sosiál hodi halo limpeza jerál iha tasi ibun Cristo Rei, hodi komemora loron refere ho tema “ambiente ne’ebé saudável sei fo moris naruk ba ita hotu.”
Ba atividade sosiál refere, Xefe Komisaun ba program AAE, Adilsonio da Costa Junior hatete, atividade ida ne’e hanesan atividade regular hosi AAE nian, ne’ebé kada tinan sira sempre halo, iha sira nia atividade sosiál.
“Ita hatene ohin loron, loron mundial ba meiu ambiente, entaun ami uja oportunidade ida ne’e hodi kontribui fila-fali. Iha ne’e iha kolega estudante sira hosi universidade oi-oin, ami mai hamutuk depois ami hili lixu iha tasi-ibun, entaun ne’e parte ida hosi programa bolseiru Ajuda Atu Estuda ni-nian ne’ebé mak ami halo, servisu hamutuk ho kolega bolseiru sira nomos voluntáriu sira ne’ebé mak iha interese no hakarak partisipa iha programa ida ne’e,” dehan Adilson ba Neon Metin iha Cristo Rei, Domingu, 05/06.
Iha fatin hanesan partisipa iha atividade ne’e, bolseiru Asension Resistencia Revolus hatete ohin loron mundiál meiu ambiente nian, entaun sira aproveita loron ida ne’e hodi halo limpeza jeral no nia sente kontente tanba liu hosi atividade ne’e bele kontribui ona atu hamenus lixu iha ita nia tasi-ibun no konsensializa ema atu labele soe fo’er arbiru.
“Sente kontente tanba mezmu ke ho inisiativa ne’ebé ki’ik maibé bele ajuda ona iha parte balun, diminui ona lixu i au mezmu tempu tanba iha ne’e agora tempu da-dauk ema barak atu mai halo rekreasi, entaun sira mos bele haree katak lixu ne’e tenki ser tau duni iha nia fatin, labele soe arbiru tanba nia impaktu ba futuru ne’e boot tebes,” dehan Asension.
Nune’e mos bolseiru Sedeligio V. M Carvalho do Rego sente orgullu tebes hodi partisipa iha aktividade ida ne’e, tanba ne’e hanesan responsabilidade moral ida ba ita atu halo tanba nia haree fatin sira iha ita nia sidade laran lixu barak tebes liu-liu fatin potensial sira hanesan Cristo Rei, liu ba Pantai Kelapa no fatin seluk.
“Tanba ne’e mak ho inisiativa tomak hosi AAE nian atu halo limpeza ida ne’e. Sente orgullu tebes, au mezmu komemora mos loron mundial meiu ambiente nian, entaun aproveita okaziaun ida ne’e hodi halibur joven sira ne’ebé iha universitáriu iha Timor laran tomak, kuaze 40 i tal, ohin dadeer jam 07:00 ho Pontulidade mai iha ne’e (halo limpeza),” Sedeligio orgullu ho atividade limpeza ne’ebé sira halo.
Program AAE ne’e rasik hanesan program bolseiru ida hodi ajuda joven sira, iha sira nia família ekonomikamente hodi kontinua sira nia estudu iha universidade. Grupu ne’e rasik harii hosi Adilson ho nia belun balu hosi nasaun Alemaña hodi fasilita joven sira kontinua sira nia estudu iha nível universitáriu.