Reportajen Santina Lucia da Costa
Embaixadór Filipina iha Timor-Leste, Abdul Maid Kiram Muin, ohin enkontru ho Prezidente Republika, Dr. José Manuel Ramos Horta hodi despede tanba termina nia misaun diplomata iha 22 Juñu Tinan ne’e.
“Hau mai hasoru Prezidente Republika tanba hau remata ona hau nia misaun diplomatika durante iha Timor-Leste. Antes husik Timor mai despedida ho Prezidente Republika. Iha loron 22 Junu fila ona ba Filipina.” Informa, Embaixadór Filipina iha TL, Abdul Maid Kiram Muin, ba Jornalista sira hafoin enkontru ho Xefi Estadu iha Palasiu Prezidensial Nicolau Lobato, Bairu-Pite, 7/6.
Diplomata ne’e dehan, relasaun diplomatikas entre país rua ne’e komesa iha iha 2002.
“Kolabora ho Timor-Leste iha aspetu sosiu-kultural, Edukasaun, Agrikultura no Ekonomia. Filipina mós suporta vistu ba estudantes Timoroan sira barak hamutuk 300 ital ne’ebe estuda iha Filipina, balun remata ona mai kontinua serbisu iha Timor. Kooperasaun nasaun rua ne’e di’ak tebes.” afirma Abdul Maid.
Abdul Maid dehan ikus liu Governu Filipina mós sempre suporta Timor-Leste atu sai membru ba ASEAN.
