Reportajen David da Costa Gusmao
VIII Governu Konstitusionál, ne’ebe maka lidera husi Primeiru Ministru (PM) Taur Matan Ruak, kongratula Governu Australia, ne’ebé retira (dada hikas) ona akuzasaun hasoru Bernard Colliery durante tinan haat.
“VIII Governu Konstitusionálál, apresia desizaun ne’ebé fó-sai horisehik husi Prokuradór Jerál Australianu, Mark Dreyfus, hodi retira (dada-hikas) akuzasaun hasoru Bernard Collaery, hafoin tinan haat nia hetan akuzasaun, tanba divulga informasaun konfidensiál sira kona-ba suporta operasaun espionajen Austrália nian iha Timor-Leste,”dehan iha komunikadu Imprensa ne’ebé Neon Metin asesu husi Gabinete Primeiru Ministru, Sesta 8/07.
Iha komunikadu ne’e haktuir, Prokuradór Jerál, Mark Dreyfus QC MP hato’o iha anúnsiu desizaun ne’e katak tau iha konsiderasaun “kompromisu atu proteje interese nasionál Austrália nian, inklui seguransa nasionál no relasaun Austrália ho ninia viziñu besik sira”.
Governu Timor-Leste rekoñese no agradese kontribuisaun Bernard Collaery no ninia kliente, eis-espiaun ida koñesidu hanesan testemuña, iha prosesu ne’ebé permite ona atu estabelese fronteira marítima definitiva sira entre Timor-Leste ho Austrália iha Tasi Timor, ne’ebé atinje ona ho asinatura tratadu entre país rua ne’e iha loron 6 fulan Marsu 2018.
Timor-Leste selebra no rekoñese mós kontribuisaun povu australianu nian ne’ebé durante ne’e apoia no kontribui ona hodi taka akuzasaun ida-ne’e no hodi alkansa akordu delimitasaun fronteira marítima ho Austrália.
Nune’e mós iha komunikadu ne’e portavós Governu nian, Ministru Prezidénsia Konsellu Ministrus, Fidelis Manuel Leite Magalhães, lori Konsellu Ministrus no Governu tomak nia naran, hato’o parabéns ba Governu australianu ba desizaun ida ne’ebé justa no afirma katak korresaun ba erru ne’ebé uluk komete ona sei kontribui atu hakle’an liután relasaun amizade entre país viziñu rua ne’e.
“Governu Konstitusionál VIII komprometidu atu harii futuru ida ne’ebé prósperu, iha ne’ebé Austrália sai hanesan parseiru ida ne’ebé labele substitui,” hateten iha komunikadu ne’e.