Reportajen estudante estajiadu UNTL, Joselina dos Santos
Ministru Ensinu Superior Siénsia e Kultura (MESSK), Longuinhos dos Santos husu ba graduante Universidade Oriental Timor Lorosa’e (UNITAL), ba dala X tinan akadémiku 2022, atu nafatin ka’er metin sira nia objetivu ne’ebé iha, tanba importante tebes ba graduante sira atu sai traballadór ka servisu na’in ho kompetente no sai mos sidadaun ne’ebe hatudu ho disponivel, atu kontribui ba hadi’a sosiedade nia moris.
Ministru Ensinu Superior Siénsia e Kultura (MESSK), Longinhos dos Santos hatete ohin loron instituisaun barak hanesan empreza no Organizasaun Governamental no Naun-Governamental sira valoriza no promove tebes ema ne’ebe dedika-an no hakarak aprende, ho razaun ida ne’e imi tenke ativu iha imi nia dalan hafoin sai husi Universidade ne’e no hatudu ba sosiedade katak imi iha kbi’it di’ak ne’ebé aprende no hetan ona husi Instituisaun ida ne’e.
“Ha’u hato’o felisitasaun ba graduante sira ho familia tomak tanba ha’u hatene katak familia nia apoiu mak nu’udar alternativa fundamental ida ba graduante sira nia susesu”, hatete Ministru Ensinu Superior Siénsia e Kultura (MESSK), Longinhos dos Santos iha nia diskursu graduasaun iha salaun UNITAL, 15/07.
Governante ne’e hatutan, estudante sira ne’ebe remata iha nivel Ensinu Superior iha instituisaun sira ne’e uniku iha imi nia kabas, tanba imi iha hela mehi husi familia ne’ebe hakarak haree atu loron ida sira nia oan hetan susesu, ho razaun ne’e mak familia esforsu mazimu ba oan sira nia estudu maske iha kondisaun no dezafiu nia laran maibe bele remata imi nia formasaun.
Ministru informa kada grupu estudante sira ne’ebe gradua nu’udar misaun ida ne’ebe Universidade halo ona, tanba konkretiza duni ho objetivu iha oportunidade edukativa ba ita nia foinsa’e sira.
Governu sei kontinua halo kooperasaun ho onestu, leál, solidáriu ho instituisaun ensinu superior sira inklui UNITAL atu hadi’a kualidade iha prosesu aprendizajen, ita hotu hatene katak liu husi hadi’a kualidade akadémika mak ita sei hetan estudante sira ne’ebe prepara-an ho ezijénsia no enfrenta husi kompetitivu ne’ebe sempre iha mudansa.